ՀՀ Ազգային ժողովի նիստում կառավարության ժամի շրջանակներում առաջարկ է հնչել բնակչության կողմից շաքարի սպառման սահմանափակումներ մտցնելու մասին:
Պատգամավոր և գործարար Խաչատուր Սուքիասյանը առաջարկել է սննդամթերքի ոլորտում բարեփոխումներ մշակել և ներդնել՝ բնակչության կողմից շաքարի սպառումը նվազեցնելու նպատակով՝ պատճառաբանելով դա բժշկական և տնտեսական ցուցանիշներով։ Սուքիասյանը հիշեցրել է, որ զարգացած երկրներում կան սահմանափակումներ, իսկ Հայաստանում կան բազմաթիվ ընկույզներ, մրգեր և հատապտուղներ, որոնք կարող են փոխարինել շաքարը, որը ծխախոտից ոչ պակաս վնասակար է։
Փոխվարչապետ Տիգրան Խաչատրյանը, պատասխանելով հարցին, հայտարարել է, որ թեման շատ կարևոր է և նախկինում արդեն քննարկվել է։ «Բայց միանգամից մի շարք հարցեր են առաջանում՝ կապված փոխարինիչների օգտագործման հետ և այն առումով, թե որքանով են վնասակար հենց այդ փոխարինիչները», – նկատել է փոխվարչապետը։
Նրա խոսքով, անհրաժեշտ է օգտագործել բոլոր մեթոդները, ինչպես կրթական, այնպես էլ բժշկական, որպեսզի մարդիկ փոխեն իրենց սննդային վարքագիծը և այդպիսով կփոխվի նաև իրավիճակը։ Առողջապահության նախարարությունը նույնպես պետք է ուսումնասիրի իրավիճակն աշխարհում։ Անհրաժեշտ է կրկին պատշաճ կերպով ուսումնասիրել վերջին տարիներին աշխարհում ստեղծված իրավիճակը և որոշել կամ առաջարկել նոր կարգավորումներ, նկատել է Խաչատրյանը։
News.am
