ՀՀ վարչապետ Նիկոլ Փաշինյանը ցանկանում է եկեղեցին բաժանել 2 մասի՝ «օծյալ կաթողիկոսի եկեղեցի» և իր պատկերացրած «իրական Հայաստանի եկեղեցի», ու այդ երևույթը սովորական դարձնել հավատացյալների ականջի համար։ Այս մասին Sputnik Արմենիայի հետ զրույցում ասաց քաղտեխնոլոգ Վիգեն Հակոբյանը։
Ինչպես հայտնի է, հոկտեմբերի 26-ին և նոյեմբերի 2-ին ՀՀ վարչապետ Նիկոլ Փաշինյանն անցելել է Հովհաննավանք ու մասնակցել կարգալույծ եղած Ստեփան Ասատրյանի (նախկինում` տեր Արամ քահանա Ասատրյան) մատուցած «պատարագին»։ Նոյեմբերի 9-ին էլ Փաշինյանը Թալինի Սուրբ Աստվածածին եկեղեցում մասնակցել է տեր Թադե քահանա Թախմազյանի (նրա հարցն ընդգրկված է Մայր աթոռի կարգապահական հարցերով հանձնախմբում – խմբ․) մատուցած պատարագին։ Թեպետ տեր Թադեն գործող քահանա է, բայց արդեն իսկ տարբեր շրջանակներում մտահոգություններ կան, որ Հովհաննավանքի, այսպես ասած, զավթման ճակատագրին կարող է արժանանալ նաև Թալինի Սուրբ Աստվածածինը։
«Այս քայլերով Նիկոլ Փաշինյանը փորձում է փաստացի «2 եկեղեցու» փաստը սովորական դարձնել հավատացյալների ականջի համար։ Այսինքն` շեշտը դրվում է ոչ թե տվյալ պարագայում զանգվածային բնույթի (թեպետ Նիկոլ Փաշինյանի և իր թիմակիցների համար դա ևս շատ կարևոր է), այլ պարբերականության վրա։ Փաշինյանը նաև հասկանում է՝ իր կողմնակիցներից քչերն են մասնակցում այդ «պատարագներին», քանի որ որոշ չափով աստվածավախություն կա։ Ինքը հերթական կարմիր գիծն է հատել՝ կապված Հայ առաքելական եկեղեցու հետ՝ փորձելով այն պառակտել «օծյալ կաթողիկոսի եկեղեցու» և իր պատկերացրած «իրական Հայաստանի եկեղեցու»։ Փորձում է այնպես անել, որ մարդիկ սովորեն Հայ առաքելական եկեղեցու` նման երկակի ստատուսին»,- նշեց Հակոբյանը։
Նրա խոսքով՝ Թալինի եկեղեցում և մյուս եկեղեցիներում տեղի ունեցածը «Քաղաքացիական պայմանագրի» հերթական կուսակցական ժողովներիվ է, որն իրենք պատարագ են անվանում։ Հակոբյանի պնդմամբ՝ Փաշինյանը ցանկանում է իր պատկերացրած եկեղեցին «ստեղծել»՝ իր կանոններով, իր կադրերով, իր արարողակարգերով։
Ըստ քաղտեխնոլոգի՝ այն հանգամանքը, որ պաշտոնական Երևանի դիրքորոշումը Մայր աթոռի համար դատապարտելի է և որակվում է որպես սրբապղծություն, ինչ-որ չափով զսպում է Փաշինյանի նույնիսկ մերձավոր շրջապատին, և նրանք խուսափում են այդ «պատարագներին» մասնակցելուց։
Հարցին՝ արդյոք բացի գործադիրի և օրենսդիրի ներկայացուցիչներից, այլ քաղաքացիներ նույնպես հակված են մասնակցել այդ «պատարագներին», Հակոբյանը նշեց՝ ակնհայտ է, որ մարդկանց քանակը բավականին փոքր է, որևէ տենդենց էլ չի երևում, որ կարող է շատանան։ Քաղտեխնոլոգն ընդգծում է, որ Փաշինյանի կազմակերպած «միջոցառումներին» նույն մարդիկ են լինում, պաշտոնյաների դեպքում էլ՝ մի օր մեկն է գնում, մյուս օրը՝ մյուսը։
«Կարծում եմ, որ եկեղեցու թեմայում Նիկոլ Փաշինյանն ակնհայտ պրոբլեմներ ունի, էդ պրոբլեմները կապված են հայկական արմատների, արմատավորված պատկերացումների հետ»,- ասաց Հակոբյանը։
Ըստ նրա՝ Փաշինյանը փորձելու է կազմակերպել իր հավաքները նաև այն եկեղեցիներում, որոնց քահանաները դեռ կարգալույծ չեն եղել։
Հավելենք, որ նոյեմբերի 16-ին էլ ՀՀ վարչապետը պատրաստվում է պատարագի մասնակցել Վայոց Ձորի Խաչիկ գյուղի եկեղեցում։
