2026 թվականի խորհրդարանական ընտրությունների համար ՀՀ բյուջեից մոտ 4 մլրդ 450 մլն դրամ կհատկացվի։ Այս մասին 2026 թվականի պետական բյուջեի նախագծի` խորհրդարանական հանձնաժողովների մակարդակով տեղի ունեցած քննարկման ժամանակ պատգամավորների հարցերին պատասխանելիս հայտարարեց ԿԸՀ նախագահ Վահագն Հովակիմյանը։
Կենտրոնական ընտրական հանձնաժողովը 2021 թվականի արտահերթ խորհրդարանական ընտրությունների համար ստացել է մոտ 2.8 մլրդ դրամ։ Եվս 1.1 մլրդ վճարվել է պետբյուջեից, բայց ոչ թե ԿԸՀ-ի մասով, այլ ընտրատեղամասերում տեսախցիկների սպասարկման համար։
Սակայն նույնիսկ այս 1.1 մլրդ–ը հաշվի առնելով՝ մոտ 500 մլն դրամի տարբերություն է մնում։ Ինչպես բացատրեց Հովակիմյանը, այս տարբերությունը պայմանավորված է տեղամասային ընտրական հանձնաժողովների անդամների և տեսախցիկների սպասարկման աշխատակիցների աշխատավարձերի բարձրացմամբ։
Բացի այդ, 2026 թվականի աշնանը ՏԻՄ ընտրություններ կանցկացվեն երկրի 70 համայնքներից 46-ում։ ԿԸՀ–ն դրա կազմակերպման համար մոտ 2.5 մլրդ դրամ կստանա։
Sputnik Արմենիա
