Հայաստանի հետ գործարքը կամրապնդի ԱՄՆ հետաքրքրությունը Կովկասում՝ ռազմավարական առումով կարևոր տարածաշրջանում, որտեղ տասնամյակներ շարունակ գերիշխում էր Ռուսաստանը, գրել է Bloomberg-ը՝ մեկնաբանելով Վաշինգտոնի որոշումը՝ հաստատել NVIDIA չիպերի արտահանումը հայկական Firebird սուպերհամակարգչային ստարտափի համար։
Հրատարակությունը նշում է, որ սա ԱՄՆ նախագահ Դոնալդ Թրամփի վարչակազմի «չիպային դիվանագիտության» մի մասն է. ԱՄՆ-ն ընդլայնում է իր ազդեցությունը՝ բացելով առաջադեմ արհեստական բանականության տեխնոլոգիաների հասանելիությունը։ Մեկ օր առաջ Վաշինգտոնը նաև թույլատրել էր առաջադեմ չիպերի վաճառքն ԱՄԷ-ին և Սաուդյան Արաբիային, իսկ Սպիտակ տունը դեմ է արտահայտվել Nvidia-ի արտաքին արտահանման սահմանափակումներին։
Հոդվածում ընդգծվում է գործարքի կարևորությունը. օգոստոսին Թրամփը խաղաղության հռչակագիր էր ստորագրել ՀՀ վարչապետ Նիկոլ Փաշինյանի և Ադրբեջանի նախագահ Իլհամ Ալիևի հետ՝ ստանալով բացառիկ իրավունքներ զարգացնելու Հայաստանի միջով անցնող տարանցիկ միջանցքը՝ «Թրամփի երթուղին»։ Ըստ Bloomberg-ի՝ արհեստական բանականության նախագծերն այժմ դառնում են ԱՄՆ-ի կողմից տարածաշրջանում իր դիրքերն ամրապնդելու և ռուսական ազդեցությունը շրջանցելու ևս մեկ գործիք։
Firebird ընկերությունը հունիսին հայտնել էր, որ Հայաստանում կկառուցվի 500 մլն դոլար արժողությամբ AI տվյալների կենտրոն՝ արհեստական բանականության ամպային հարթակ ստեղծելու համար։ Ծրագիրն իրականացվում է ՀՀ կառավարության և NVIDIA-ի հետ համագործակցաբար։ Նշվում է, որ կտեղակայվեն հազարավոր NVIDIA Blackwell GPU-ներ, կձևավորվի ավելի քան 100 մեգավատտ հզորությամբ ենթակառուցվածք, որի գործարկումը նախատեսվում է 2026 թվականին։
ԲՏԱ նախարար Մխիթար Հայրապետյանը հայտարարել էր, որ Վաշինգտոնում Հայաստանի և ԱՄՆ-ի միջև ստորագրված հուշագիրը ՀՀ-ում ԱԲ գործարանի ստեղծման հիմք կհանդիսանա։ Ծրագիրն իրականացվում է ՀՀ կառավարության և NVIDIA-ի հետ համագործակցաբար։
Firebird-ը և Հայաստանի կառավարությունը հիմք են դնում տարածաշրջանում տեխնոլոգիաների զարգացման համար՝ թույլ տալով ընկերություններին և ձեռնարկատերերին օգտագործել AI-ի ընձեռած նոր հնարավորությունները և աջակցելով տնտեսական աճին Հայաստանում և ամբողջ Կովկասում:
Armenia Today
