Euronews-ը, ենթադրաբար, շահույթ է ստացել ավտորիտար ռեժիմների հետ առևտրային գործարքներից:
Ըստ Euractiv-ի հետաքննության, այս գործընկերությունները ներառում են Ադրբեջանում, Ղազախստանում և Ուզբեկստանում ստեղծված կազմակերպություններ։
Հետաքննության մեջ նվշում է, որ հեռուստաալիքը, որը տարիներ շարունակ վնասով էր գործում՝ չնայած Եվրամիության կողմից զգալի սուբսիդիաներին, վերջերս անսպասելիորեն սկսել է շահույթ ստանալ։ Այս փոփոխությունը բացատրվում է ոչ թե լրագրողական հաջողություններով, այլ խնայողության քաղաքականությամբ և նոր առևտրային համաձայնագրերով։
Euractiv-ը գրում է, որ Euronews-ը իր գոյության ընթացքում վնասով է գործել՝ կրելով մոտ 180 միլիոն եվրոյի կուտակային վնասներ։ Ենթադրվում է, որ ԵՄ-ի ավելի քան 350 միլիոն եվրոյի սուբսիդիաները վճռորոշ դեր են խաղացել հեռուստաալիքի գոյատևման գործում։
Աշխատակիցների հայտարարություններին հղում անելով՝ ուսումնասիրությունը նշում է, որ ֆինանսական վիճակը հատկապես վատթարացել է վերջին տարիներին՝ «ծայրահեղ խնայողության միջոցառումների» կիրառման և նույնիսկ ամենահիմնական երաշխիքների բացակայության պատճառով։ Դրան հաջորդել է աշխատանքից ազատումների զանգվածային ալիք, որի արդյունքում շատ աշխատակիցներ կորցրել են աշխատանքը։
Euractiv-ի ուսումնասիրությունը պնդում է, որ Euronews-ը վերջերս սկսել է շահույթով աշխատել: Այս փոփոխությունը, որը միայն լրատվական գործունեության արդյունք չէ, կարող է մասամբ պայմանավորված լինել նաև խիստ կրճատումներով, մասամբ էլ՝ ավտորիտար կառավարման ոլորտում հայտնի երկրների հետ նոր առևտրային համաձայնագրերով։
Ուսումնասիրությունը պնդում է, որ Euronews-ը տարբեր գործընկերություններ է կնքել և դուստր ձեռնարկություններ է հիմնել այնպիսի երկրներում, ինչպիսիք են Ադրբեջանը, Ղազախստանը և Ուզբեկստանը: Այս երկրները նկարագրվում են որպես սահմանափակ մամուլի ազատությամբ հայտնի ռեժիմներ։
Ըստ ուսումնասիրության՝ նոր ֆինանսական մոդելը կարող է բացասաբար ազդել խմբագրական աշխատանքի վրա. աշխատակիցները բողոքում են քաղաքական միջամտությունից, ինքնագրաքննությունից և լուսաբանման ուշացումներից: Ներքին նամակում նաև նշվում է, որ 48 աշխատակից ղեկավարությանը զգուշացրել են «խմբագրական անկախության քայքայման» մասին։
Ավելին, նշվում է, որ նոր կառավարման կառուցվածքը կապեր է հաստատել Հունգարիայի վարչապետ Վիկտոր Օրբանի, ինչպես նաև լրատվամիջոցների և հեռահաղորդակցության ոլորտներում ազդեցություն ունեցող նախկին քաղաքական գործիչների և ներդրողների հետ: Քննադատները նշում են, որ այս իրավիճակը լղոզում է լրագրության, լոբբինգի և առևտրային շահերի միջև եղած սահմանները։
Ուսումնասիրությունն ընդգծում է մի կարևոր կետ ևս. նախորդ ղեկավարության օրոք Euractiv-ն առևտրային համաձայնագրեր ուներ ավտորիտար ռեժիմների հետ, բայց ոչ այն մասշտաբով, որը նկարագրված է Euronews-ի դեպքում: 2023 թվականին Euractiv-ն Անտվերպենում գործող Mediahuis խմբին վաճառելուց հետո, նոր ղեկավարությունը, ըստ տեղեկությունների, սկսել է կրճատել նման համաձայնագրերը և ԵՄ ֆինանսավորումից կախված որոշ նախագծեր։
Euronews-ի՝ Բաքվի տեղական գրասենյակը բացվեց անցյալ տարվա նոյեմբերին: Բացման արարողության ժամանակ ընկերության տնօրենների խորհրդի նախագահ Պեդրո Վարգաս Դավիդը հայտարարեց, որ իր ղեկավարած մեդիա ընկերությունը «հավասարակշռված դիրքորոշում» է պահպանում Ադրբեջանի նկատմամբ և հենց դրա համար է ճնշման ենթարկվում։
Euronews-ի Բաքվի գրասենյակի բացումը հանրային քննարկումների և քննադատության առիթ է դարձել վերջին երկու տարվա ընթացքում Ադրբեջանում մոտ 30 լրագրողի ձերբակալությունից, 2025 թվականի մարտին և ապրիլին BBC-ի, Reuters-ի, Voice of America-ի և Bloomberg-ի նման միջազգային լրատվամիջոցների գործունեության կրճատումից և մի շարք անկախ տեղական լրատվամիջոցների աշխատանքի զգալի խոչընդոտումից հետո։
News.am
