Կառավարությունում վարչապետ Նիկոլ Փաշինյանի և Ն.Ս.Օ.Տ.Տ Գարեգին Երկրորդ Ծայրագույն Պատրիարք և Ամենայն Հայոց Կաթողիկոսի նախագահությամբ տեղի է ունեցել Հայաստանի Հանրապետության և Հայաստանյայց Առաքելական Սուրբ Եկեղեցու հարաբերություններին առնչվող հարցերով աշխատանքային խմբի առաջին հանդիպումը:
«Եկեղեցական հիմնահարցերի օրենսդրական կարգավորումներում պետք է նկատի առնվեն նաև Հայոց ցեղասպանության, ինչպես և խորհրդային տարիներին Եկեղեցու նկատմամբ իրագործված հալածանքների հետևանքով Հայ Առաքելական Եկեղեցուն հասցված նյութական և մարդկային ահռելի վնասներն ու կորուստները, այդ թվում՝ վանքերի, եկեղեցիների, եկեղեցական ենթակառուցվածքների ավերումն ու ոչնչացումը և ունեցվածքի ու կալվածքների բռնազավթումը», – ասաց Պատրիարքը:
Ըստ նրա, այդ ամենը, ինչպես և այդ ժամանակաշրջանում Եկեղեցի-պետություն հարաբերությունների փաստացի չգոյության իրողությունը չեն թույլատրել վերականգնելու կրած կորուստները:
«Այս համատեքստում կարևոր է պետության զորակցությունը, որպեսզի Եկեղեցին կարողանա վերականգնել անհրաժեշտ պայմաններն ու հնարավորությունները իր առաքելության համար ի հայրենիս և ի սփյուռս», – նշեց նա:
Ինչպես հայտնում է ՀՀ կառավարության մամուլի ծառայությունը, Փաշինյանն այս առումով մեծապես կարևոր է համարել պետության և Եկեղեցու համագործակցությունը՝ թելադրված ազգային շահերով ու գերակայություններով, ազգային ինքնությունը, ոգին, նկարագիրը պահպանելու հրամայականով:
Նա կարևորել է նաև աշխատանքային խմբի գործունեությունը և սահմանել այն հարցերի շրջանակը, որոնք քննարկման ենթակա կդառնան: Այդ հարցերի շրջանակում կառավարության ղեկավարը նշել է հայ եկեղեցու պատմության դասավանդումը դպրոցներում, եկեղեցու գույքի հարկադրումը, տեղեկացնում է Newsarmenia.am-ը: