«Wizz Air» ավիաընկերությունը Հայաստանից 2 նոր ուղղություններով թռիչքներ է մեկնարկում, ինչպես նաև բազավորում է իր երրորդ օդանավը «Զվարթնոցում»։ Այս մասին ասուլիսում հայտարարեց «Wizz Air» ավիաընկերության կոմերցիոն տնօրեն Յան Մալին։
«Դեպի Նիդեռլանդների Էյնդհովեն քաղաք չվերթերը կլինեն 2026–ի հոկտեմբեր ամսից` շաբաթը 3 անգամ, իսկ դեպի Բելգիայի Շառլերուալ քաղաք` 2027–ի փետրվարից, կրկին շաբաթը 3 անգամ»,–ասաց նա։
Նա հավելեց, որ ավելանալու է նաև գործող ուղղությունների թռիչքների քանակը։
Մասնավորապես դեպի Բուդապեշտ թռիչքները շաբաթական 2–ից կդառնան 4, դեպի Փարիզ չվերթերը 3–ից կդառնան շաբաթական 5, դեպի Ֆրանկֆուրտ շաբաթական 2 չվերթերը կդառնան 3, իսկ դեպի Պրահա կկատարվի շաբաթական 4 չվերթ։
Անդրադառնալով Sputnik Արմենիայի հարցին, որ մի շարք քաղաքացիներ դժգոհություններ ունեն կապված թռիչքների չեղարկումների հետ, Մալինը նշեց, որ ներողություն է խնդրում պատճառված անհարմարության համար, սակայն այդ չեղարկումները տեղի են ունենում մի շարք պատճառներով։
«Չեղարկումների պատճառ կարող են դառնալ, օրինակ, վատ եղանակային պայմանները, Մերձավոր Արևելքում տիրող իրավիճակը, չեղարկումներ կարող են լինել տեխնիկական խնդիրների պատճառով, օրինակ` շարժիչների հետ կապված»,–ասաց նա։
Մալինը առաջարկեց այն քաղաքացիներին, որոնց չվերթերը չեղարկվել են, դիմեն իրենց պաշտոնական կայքի միջոցով և փոխհատուցում հայցեն` լրացնելով համապատասխան հայտը կամ իրենց հետ կապ հաստատեն կայքում նշված հեռախոսահամարներով։
Նա ընդգծեց, որ միշտ էլ ավելի հեշտ է նկատել, երբ որևէ թռիչք չեղարկվում է կամ հետաձգվում, քան տեսնել կայացած թռիչքների քանակը։
«Որպեսզի խոսքերս օդում չմնան, նշեմ, որ մենք ունենք թռիչքների 99,78 % կատարողական։ Այսինք`ն այդքան տոկոս դեպքերում թռիչքներըւ կատարվում են անխոչընդոտ»,–ասաց նա։
Հավելենք, որ ընդհանուր առմամբ «Wizz Air» ավիաընկերությունը Հայաստանից կիրականացնի չվերթեր 18 ուղղություններով դեպի 10 երկիր:
