Ըստ բնակիչների վարկածի՝ Կիրանց համայնքի նկատմամբ սիրո խոստովանությանը դեմ են հանդես եկել սահմանի հակառակ կողմից, ինչից հետևում է, որ ինչ-որ մեկին խիստ նյարդայնացնում է հայերի սերն այն գյուղի նկատմամբ, որի մի մասը, հիշեցնեմ, գարնանը հանձնվեց Ադրբեջանին՝ սահմանազատման պատրվակով։ Նույնպիսի ցուցանակ է առգրավվել նաև նույն մարզի Աչաջուր համայնքում:
Տեղի իշխանություններն ի արդարացում հայտարարեցին, թե սիրո խոստովանությամբ ցուցանակները տեղադրվել են ապօրինի։ Տավուշի բնակիչներն այդ առնչությամբ հարց ուղղեցին մարզպետ Հայկ Ղալումյանին. ի՞նչ հիմնավորմամբ է Իջևանում եկեղեցու պատի մոտ տեղադրված քայլող Նիկոլ Փաշինյանի արձանը: Այդ հուշարձանի պատմությունը մենք պատմել ենք բազմիցս, այն պարբերաբար ենթարկվել է հարձակումների. սկզբում կտրել էին գլուխը, հետո կոտրել ձեռքերն ու քիթը։ Վերանորոգման աշխատանքները կատարվել են բացառապես տեղական բյուջեի հաշվին։ Այդ ժամանակից ի վեր արձանը տեսախցիկներով հսկվում է բոլոր դիտանկյուններից. ասենք, եկեղեցու հարևանությամբ գտնվելն էլ առանձնապես չի տրամադրում վանդալիզմի:
Եկեղեցու տարածքում արձանի գտնվելու օրինականության մասին մարզպետը ոչինչ չասաց (արվեստի գործ կոչվելու դա ակնհայտորեն չի ձգում), փոխարենը միանգամից մեկնաբանեց Իջևանում Հայկ Ղալումյանի անվան փողոցի առկայության փաստը:
Մարզպետ Ղալումյանի խոսքերով՝ փողոցն անվանակոչվել է իր ազգականի պատվին, որը ոստիկան է եղել: Ոստիկան Հայկ Ղալումյանը վնասազերծել է ավազակին, որը նռնակը ձեռքին սպառնացել է մի կնոջ ու երեխայի։ Փորձել է նետել նռնակը նրանց ուղղությամբ, սակայն ոստիկանը իրենով փակել է կնոջն ու երեխային և, փրկելով նրանց, զոհվել է։
