Էռնեստ ԱՎԱՆԵՍՈՎ․ ԻՆՉՈ՞Ւ ՉԵՆՔ ԳՆՈՒՄ ԼԱՉԻՆԻ ՄԻՋԱՆՑՔ․ ՋՐՑԱՆՈՎ ՑՐԵԼՈՒ ԿԱՐԻՔ ԿԱ
Ինչո՞ւ չենք գնում Լաչինի միջանցք, այնտեղ չենք լուսանկարվում, ժապավեններ չենք կտրում կամ այնտեղից չենք հայտարարում քաղաքապետի թեկնածուի անունը։ Հասկանում եմ, որ այնտեղ վտանգավոր է, և ձեզ այնտեղից կարող են «լարել»։ Այս մասին այսօր՝ դեկտեմբերի 20-ին, Երևանի ավագանու արտահերթ նիստում հայտարարեց Երևանի ավագանու անդամ Էռնեստ Ավանեսովը, որը կապիտուլյացիայի մասին հայտարարության ստորագրումից հետո լքել է «Իմ քայլը» խմբակցությունը։
Նա կոչ արեց պատկերացնել Ստեփանակերտում ծանր հիվանդության դեմ պայքարող 4 ամսական երեխայի հարազատների վիճակը։ Ավանեսովը փաստեց, որ Արցախը կանգնած է հումանիտար ճգնաժամի առջև։ «Երևի ադրբեջանցիներն ու ռուսները փակել են ճանապարհը, իսկ մենք ամենևին էլ մեղավոր չենք։ Հայաստանի իշխանությունն ասում էր, որ հանրահավաքները ցրելու համար ջրցան մեքենաներ չի կիրառի։ Կարծում եմ՝ հիմա Լաչինի միջանցքում ջրցան մեքենաներ կիրառելու անհրաժեշտություն կա։ Եթե կարծում եք, որ Երևանի գլխավոր տոնածառի լույսերը կմթագնեն մարդկանց հիշողությունը և կշեղեն նրանց ցավից, ապա, վստահեցնում եմ, որ դա այդպես չէ։ Ես չեմ դիմում միջազգային կառույցներին, այլ միայն Հայաստանի և Արցախի իշխանություններին և հորդորում են անել ամեն ինչ՝ ճանապարհը բացելու համար։ Արցախը Հայաստան է, իսկ Շուշին մռայլ քաղաք չէ, մռայլը դուք եք։ Ապագա կա, բայց առանց ձեզ»,-նշեց Ավանեսովը։
