Արման ՍԱՂԱԹԵԼՅԱՆ․ ԲԱՎԱԿԱՆԻՆ ԼՈՒՐՋ ԽՆԴԻՐՆԵՐ ՈՒՆԵՆՔ ԷԼԻՏԱՆԵՐԻ ՀԵՏ (ՏԵՍԱՆՅՈՒԹ)
«Այս ողջ ժամանակաշրջանում մենք կանգնեցինք ևս մեկ կրիզիսի առջև. պարզվեց՝ մենք չունենք քաղաքացիական հասարակություն, մեզ խաբում էին»,- միջազգայնագետ Հերմինե Մխիթարյանի «Ընտրված պարտություն» գրքի շնորհանդեսին ասաց քաղաքական գիտությունների թեկնածու Արման Սաղաթելյանը։
Նա նշեց, որ այն բոլոր կառույցները, որոնք պետք է պայքարեին, աշխատեին մարդու իրավունքների, իշխանության վերահսկողության ուղղությամբ, խիստ ընտրովի ֆունկցիա էին կատարում՝ երբ դա պետք էր, չկար, երբ պետք չէր, կար։
«Այսինքն զուտ ինչ-որ կոնյուկտուրայից ելնելով, կամ այս կամ այն վեկտորի ուղղությամբ գործընթացները տանելու համար կիրառվող համակարգեր էին։
Երկրորդ՝ մենք չունեցանք այդպես էլ այդ ինստիտուցիոնալ մակարդակով ձևավորված փորձագիտական շրջանակները, որոնք պարզ է, որ պետք է ի հայտ գային գիտական հասարակության կամ մտավորականության շրջանակներից։ Եվս մեկ խնդրի առջև կանգնեցինք, որ մենք նույնիսկ դա չունենք։
Բավականին լուրջ խնդիրներ ունենք այսպես կոչված էլիտաների հետ, այդ թվում փորձագիտական, գիտական շրջանակներում»,- ասաց Արման Սաղաթելյանը։
Նրա գնահատմամբ, մենք, իրոք, աղետի առջև ենք կանգնած ոչ միայն Արցախի շուրջ զարգացող իրադարձությունները, այլ դրա տրամաբանական ու պրոյեկտիվ շարունակությունը՝ Հայաստանը և Հայաստանի պետություն լինել-չլինելը և այսպես շարունակ։
