«Ուժեղ Հայաստան» կուսակցությունը չի պատրաստվում ձեռքները ծալած նստել։ Կուսակցությունն արձագանքել է գործարար և բարերար Սամվել Կարապետյանի տնային կալանքը երկարաձգելու որոշմանը։
Հակակոռուպցիոն դատարանը` դատավոր Վարդգես Ստեփանյանի գլխավորությամբ, այս գիշեր որոշեց բավարարել քննչական խմբի ղեկավար Սպարտակ Պողոսյանի միջնորդությունը և ևս 1 ամսով երկարաձգել Սամվել Կարապետյանի տնային կալանքը։
«Կայացվեց մի որոշում, որն ապացուցում է, թե որքան է Նիկոլ Փաշինյանը վախենում Սամվել Կարապետյանից։ Մենք պաշտոնապես հայտարարում ենք թե՛ տեղական, թե՛ միջազգային քայլեր ներառող համակարգված արշավի մեկնարկի մասին. առանց այս քայլերի Հայաստանի միջազգային հեղինակությունը կփլուզվի, քանի որ այն գնում է դեպի ավտոկրատիա (անձնիշխանություն),– ասված է հայտարարությունում։
Ըստ կուսակցության` Փաշինյանը համակարգված կերպով ոչնչացնում է Հայաստանի` որպես ժողովրդավարական պետության լեգիտիմությունը:
«Մենք ձեռքներս ծալած չենք նստելու։ Առաջիկա օրերին մենք կհայտարարենք արդարությունը վերականգնելու մեր հաջորդ` կոնկրետ քայլերի մասին։ Երեք ամսից Սամվել Կարապետյանը լինելու է Հայաստանի հաջորդ վարչապետը»,- ասվում է հայտարարությունում:
Sputnik Արմենիա
