ԱՄՆ–ն հակաիրանական պատժամիջոցներ է սահմանել 17 ֆիզիկական անձանց և 18 կազմակերպությունների նկատմամբ, որոնցից մի քանիսը չինական են։ Այս մասին հայտնել են ԱՄՆ ֆինանսների նախարարությունից։
ԱՄՆ պետքարտուղար Մարկո Ռուբիոն ավելի վաղ հայտարարել էր, որ Միացյալ Նահանգները կարող է ուժեղացնել ճնշումը Իրանի վրա՝ փորձելով հասնել իր պահանջների կատարմանը, եթե Իսլամական Հանրապետությունը գործարքի չգնա Վաշինգտոնի հետ։
ԱՄՆ ֆինանսների նախարարությունում պարզաբանել են, որ պատժամիջոցները սահմանվել են այն ֆիզիկական անձանց և ձեռնարկությունների դեմ, որոնք, իբր, «համակարգում են Իրանի ստվերային բանկային ճարտարապետությունը»։
«Այդ ցանցերը թույլ են տալիս Իրանի զինված ուժերին, այդ թվում՝ ԻՀՊԿ-ին, մուտք գործել միջազգային ֆինանսական համակարգ՝ նավթի ապօրինի վաճառքի դիմաց վճարումներ ստանալու, հրթիռների և այլ սպառազինությունների համար զգայուն բաղադրիչներ ձեռք բերելու, ինչպես նաև Իրանի ահաբեկչական պրոքսիներին միջոցներ փոխանցելու համար»,-պնդում են գերատեսչությունում։
Հիշեցնենք` ԱՄՆ-ն և Իսրայելը փետրվարի 28-ին սկսել են հարվածներ հասցնել Իրանի տարածքում գտնվող օբյեկտներին, ագրեսիայի զոհ է դարձել ավելի քան 3 հազար մարդ: Վաշինգտոնն ու Թեհրանը ապրիլի 8-ին հայտարարեցին երկշաբաթյա հրադադարի մասին: Դրանից հետո Իսլամաբադում կայացած բանակցություններն ավարտվեցին անարդյունք, ընդ որում՝ մարտական գործողությունների վերսկսման մասին չէր հաղորդվում, բայց ԱՄՆ-ն իրանական նավահանգիստների շրջափակում սկսեց։
Շրջափակման պատճառով Իրանի զինված ուժերը վերականգնել են Հորմուզի նեղուցի նկատմամբ վերահսկողության ռազմական ռեժիմը:
Sputnik Արմենիա
