Ռուսաստանի իշխանությունները որոշել են արմատապես կրճատել Մոսկվայում Հաղթանակի շքերթի ավանդաբար ճոխ արարողությունը։ 2026 թվականի մայիսի 9-ին այն կանցկացվի առանց ռազմական տեխնիկայի մասնակցության, երեքշաբթի հայտարարել է Պաշտպանության նախարարությունը։ Տանկերի և հրթիռային համալիրների փոխարեն Կարմիր հրապարակով կանցնեն միայն շարասյուները։
Բացի այդ, շքերթին չեն մասնակցի նաև Սուվորովի ռազմական և Նախիմովի ուսումնարանների, ինչպես նաև կադետական կորպուսների սաները։ Փոխարենը նախատեսված է հեռարձակել «ՀՊՕ-ում գործող զորքերի», ինչպես նաև հրթիռային զորքերում, օդատիեզերական ուժերում և նավերի վրա մարտական հերթապահություն իրականացնողների աշխատանքը։ Որոշումն ընդունվել է «օպերատիվ իրավիճակով պայմանավորված», ընդգծում է Պաշտպանության նախարարությունը։
Ծանր տեխնիկայի անցում չներառող շքերթներ Ռուսաստանում անցկացվել են 1995-ից մինչև 2007 թվականը։ 2008 թվականից Ռազմավարական նշանակության հրթիռային զորքերի հրթիռային համալիրները, զրահամեքենաներն ու տանկերը կրկին սկսեցին անցնել Կարմիր հրապարակով։ Ռեկորդակիրը դարձավ հոբելյանական 2015 թվականի շքերթը՝ տարբեր տարիների 194 միավոր անվավոր և թրթուրավոր տեխնիկայով, ինչպես նաև 140 ինքնաթիռով և ուղղաթիռով։ Իսկ հակառեկորդը սահմանեց 2024 թվականի շքերթը՝ 61 միավոր տեխնիկա և ընդամենը 15 ինքնաթիռ։
Առայժմ անհասկանալի է մնում, թե օտարերկրյա առաջնորդներից ովքեր կայցելեն 2026 թվականի շքերթը։ Երկուշաբթի նախագահի մամուլի քարտուղար Դմիտրի Պեսկովը չկարողացավ նշել այն օտարերկրյա առաջնորդների անունները, որոնք կգան Վլադիմիր Պուտինի մոտ։ «Ավելի ուշ կհայտնենք», — խոստացել է Պեսկովը։ Նախագահի օգնական Յուրի Ուշակովը հայտարարել է, որ Պուտինի հյուրերը կլինեն մի քանի արտասահմանյան քաղաքական գործիչներ, սակայն անուններ չի նշել։
Մոսկվա այցելելու ծրագրերի մասին ավելի վաղ հայտարարել էր Սլովակիայի վարչապետ Ռոբերտ Ֆիցոն։ Ապրիլի 19-ին նա պատմել էր, որ Լատվիան և Լիտվան հրաժարվում են թույլ տալ իր ինքնաթիռի թռիչքը։ Ավելի ուշ նմանատիպ որոշում ընդունեց նաև Էստոնիան, իսկ Ֆիցոն Լեհաստանի տարածքով թռիչքի համար «միջանցք» էր խնդրել։ Անցած շաբաթ Ֆիցոն հայտնել է, որ որոշել է չմասնակցել շքերթին։ Վարչապետի խոսքով՝ նա, այնուամենայնիվ, չի հրաժարվում Մոսկվա այցելելու ծրագրերից և մտադիր է ծաղիկներ դնել Անհայտ զինվորի գերեզմանին։
News.am
