«Դիմադրություն» շարժումը հայտարարեց դասադուլի և գործադուլի մասին

«Դիմադրություն» շարժումը մայիսի 10-ին հայտարարում է դասադուլ և գործադուլ։ Այս մասին Ֆրանսիայի հրապարակում անցկացվող հանրահավաքում հայտարարեց ՀՀ ԱԺ փոխխոսնակ Իշխան Սաղաթելյանը։

«Նիկոլը Հայաստանում այլևս իշխանություն չունի, սա ակնհայտ փաստ է։ Մեր հետևողական քայլերի, համախմբվածության արդյունքում մեր պայքարը րոպե առ րոպե թափ է հավաքում։ Մեր անելիքի բանաձևը հստակ է` պետական կառավարման համակարգը պետք է կանգնեցնենք։ Իշխանությունը փողոցում է, մենք ենք որոշում, իսկ աթոռներին նստածներն այլևս ի վիճակի չեն որևէ բան որոշելու։ Մենք պետք է ավելի լայն տարածումով շարունակենք մեր բողոքի ու անհնազանդության ակցիաները։ Վաղը շատ կարևոր օր է բոլորիս համար և, եթե այնքան մարդ, որքան մասնակցեց երթին, դուրս գա փողոց ու անհնազանդության ակցիաներ անի` վստահեցնում եմ` հաշված օրերի ընթացքում կհեռացնենք Փաշինյանին»,- նշեց Սաղաթելյանը։

Նա կոչ արեց անհնազանդության ակցիաներին մասնակցողներին իրենց հետ փողոց բերել մեկական քաղաքացու։

Իշխան Սաղաթելյանը Նիկոլ Փաշինյանին կոչ արեց կա՛մ անցնցում հրաժարական տալ, կա՛մ իրենք երկիրը կկանգնեցնեն։

ԱԺ փոխխոսնակն ընդգծեց, որ անհրաժեշտության դեպքում կշրջափակեն նաև պետական կառավարական շենքերը, ինչի արդյունքում հնարավոր կլինի վերջնականապես ծնկի բերել ներկայիս իշխանությանը։

Մայիսի 10-ին «Դիմադրություն» շարժումը 4 ուղղություններով անհնազանդության ակցիաներ և երթեր է իրականացնելու, որոնց ժամանակ լինելու են նաև արգելափակումներ։

«Վաղը 12։00-ից երթերը սկսվելու են Գայի պողոտայից` «Մեգամոլի» դիմացից, երկրորդը` Րաֆֆու փողոցից` Անդրանիկի արձանի մոտից, երրորդը` 15-րդ թաղամասից` Չաուշի արձանի մոտից, իսկ 4-րդը` Սասունցի Դավթի արձանի մոտից։ Այդ կետերից շարժվում ենք ու ամբողջությամբ պարալիզացնում։ Մինչ այդ` առավոտյան, տեղի կունենան տարբեր անհնազանդության ակցիաներ։ Պետք է հասնենք նրան, որպեսզի ոստիկանական ուժերը ոչ մի կերպ չկարողանան կասեցնել ժողովրդի ցասումը»,- ասաց Իշխան Սաղաթելյանը։

Նա երթերի և անհնազանդության ակցիայի մասնակիցներին վաղը ժամը 19։00-ին կրկին հրավիրեց Ֆրանսիայի հրապարակ` հանրահավաքի, տեղեկացնում է Sputnik Արմենիա-ն։

Նշենք, որ այսօր Երևանի Ֆրանսիայի հրապարակում կայացավ ընդդիմության մեծ հանրահավաքը` Նիկոլ Փաշինյանի հրաժարականի պահանջով, որին հաջորդեց երթը քաղաքի կենտրոնական փողոցներով։