«Գյումրեցի պապիկների» գործով մեղադրյալները կմնան կալանավորված

Շիրակի մարզի ընդհանուր իրավասության դատարանը՝ դատավոր Ռոման Սմբատյանի նախագահությամբ, անփոփոխ թողեց «գյումրեցի պապիկների» գործով մեղադրյալներ Տարոն Մանուկյանի, Արսեն Մարտոյանի, Գոռ Մաթևոսյանի, Գոռ Սարգսյանի, Գևորգ Մուրադյանի նկատմամբ ընտրված խափանման միջոց կալանավորումը։

Տեղեկությունը ֆեյսբուքի ուղիղ եթերում հայտնեց ԱԺ «Հայաստան» դաշինքի պատգամավոր, «Դիմադրություն» շարժման համակարգող Արամ Վարդևանյանը։

«Մեր տարեց հարենակիցների ներկայացուցիչը դատական նիստի ընթացքում հայտարարեց, որ որևէ բողոք, պահանջ իրենք չունեն։ Այսինքն՝ մեր հայրենակիցները համարել են, որ դա եղել է մի վիճաբանություն, թյուրիմացություն և դա հարթված է։ Բայց ինչ տեղի ունեցավ. Մենք ներկայացրինք անձնական երաշխավորություն մեր 5 ընկերների համար, բայց դատարանը 5–ի վերաբերյալ էլ կանխատեսելիորեն կայացրեց կալանավորումը անփոփոխ թողնելու որոշում»,–ասաց Վարդևանյանը։

Հիշեցնենք, որ մայիսի 8-ին ընդդիմության կազմակերպած ավտոերթի ընթացքում Գյումրի քաղաքի Երևանյան խճուղում կանգնած քաղաքացիների և հիշյալ ավտոերթի մասնակիցների միջև տեղի է ունեցել վիճաբանություն։

Քննչական կոմիտեն հայտնել է, որ մի խումբ երիտասարդներ՝ իջնելով ավտոմեքենայից, մոտեցել են հասարակական տրանսպորտի կանգառում կանգնած տարեց տղամարդկանց և սկսել հարվածներ հասցնել նրանց մարմնի տարբեր մասերին:

Ընդդիմադիրներն իրենց հերթին հայտնել են, որ տեղի ունեցածը սադրանք էր. հավաքվածները մինչ այդ ձվերով, քարերով հարվածել են երթի մասնակիցների ավտոմեքենաներին, հայհոյանքներ հնչեցրել։

Հավելենք, որ նշված գործով մեղադրանք է առաջադրվել 7 անձի, որոնցից 5-ի նկատմամբ որպես խափանման միջոց է ընտրվել կալանքը:

Sputnik Արմենիա