Եվրոյի փոխարժեքը հասել է 20 տարվա նվազագույնին

Երկուշաբթի՝ սեպտեմբերի 5-ին, եվրոյի փոխարժեքը հասել է մի քանի տասնամյակների նվազագույնին` իջնելով 0,7 տոկոսով՝ մինչև 0,988 դոլար, գրում է Financial Times-ը։ Սա ամենացածր արժեքն է 2002 թվականից։

Իջել են նաև եվրոպական բաժնետոմսերը՝ տարածաշրջանային Stoxx 600-ը նվազել է 1 տոկոսով, գերմանական Dax-ը՝ 1,7 տոկոսով, ֆրանսիական Cac 40-ը՝ 1,8 տոկոսով, իսկ Լոնդոնի FTSE 100-ը՝ 0,7 տոկոսով:

Մոսկովյան բորսայում եվրոյի փոխարժեքը նվազել է գրեթե մեկ ռուբլով, և նվազագույնը կազմել է 59,855 ռուբլի, գրում է Forbes ամսագրի ռուսական տարբերակը։

Դա տեղի է ունեցել Եվրոպա «Հյուսիսային հոսք» գազատարով գազի մատակարարումն անորոշ ժամկետով դադարեցնելու «Գազպրոմ»-ի որոշումից հետո։ Ռուսական ընկերությունը դա բացատրել է «Պորտովայա» կոմպրեսորային կայանում գազի մղման Trent 60 սարքի շահագործման տեխնիկական խնդիրներով, մասնավորապես, մասնագետները նավթի արտահոսք են նկատել։ «Գազպրոմն» ընդգծել է, որ նման խնդիրների արդեն հանդիպել է Կանադայում հիմնովին վերանորոգված Siemens ագրեգատորների հետ աշխատելիս՝ նշելով, որ վթարի վերանորոգումը հնարավոր է միայն «մասնագիտացված վերանորոգման ընկերության» պայմաններում»։

«Հյուսիսային հոսք»-ի դադարեցման մասին «Գազպրոմ»-ի հայտարարությունից հետո երկուշաբթի՝ սեպտեմբերի 5-ին, Եվրոպայում գազի բորսայական գինը բարձրացել է 30 տոկոսով՝ հասնելով 1000 խմ-ի դիմաց գրեթե 2900 դոլարի։ Ուրբաթ օրը՝ սեպտեմբերի 2-ին, առևտուրն ավարտվել է 1000 խ/մ-ի դիմաց 2213 դոլարի մակարդակում:

News.am