Աբդոլլահիանը դժգոհություն է հայտնել Ադրբեջանի անիրատեսական մեկնաբանությունների կապակցությամբ

Իրանի արտգործնախարար Հոսեյն Ամիր Աբդոլլահիանը դժգոհություն է հայտնել Ադրբեջանի պաշտոնյաների մի շարք անիրատեսական մեկնաբանությունների կապակցությամբ։

Ադրբեջանի արտգործնախարար Ջեյհուն Բայրամովի հետ հեռախոսազրույցում նախարարները քննարկել են Թեհրանի և Բաքվի միջև հարաբերությունները և փոխադարձ հետաքրքրություն ներկայացնող հարցեր, հաղորդում է Tasnim-ը:

Դժգոհություն հայտնելով վերջին օրերի որոշ անիրատեսական հայտարարությունների կապակցությամբ՝ Աբդոլլահիանը երկրների ինքնիշխանության և տարածքային ամբողջականության հարգումը, ինչպես նաև նրանց ներքին գործերին չմիջամտելը կարևոր և հիմնարար սկզբունք է անվանել։

Նրա խոսքով ՝ հարևանների, այդ թվում՝ Ադրբեջանի հետ կապերի զարգացումը Իսլամական Հանրապետության արտաքին քաղաքական օրակարգի առաջնահերթությունն է։ Ընդգծելով երկու երկրների միջև կապերի համակողմանի զարգացման անհրաժեշտությունը՝ նա իր ադրբեջանցի գործընկերոջը հրավիրել է միանալ «3+3» մեխանիզմի շրջանակում միջոցառումներ անցկացնելու իրանական նախաձեռնությանը, որի նպատակն է դիվանագիտական ճանապարհով լուծել տարածաշրջանային խնդիրները։

Ւր հերթին, Ադրբեջանի արտգործնախարարը մատնանշել է Աստանայում երկու երկրների նախագահների վերջին հանդիպումը՝ Թեհրանում և Բաքվում պաշտոնական անձանց միջև բանակցություններն ու շփումները որակելով դրական: Բայրամովը Ադրբեջանի Հանրապետության պատրաստակամությունն է հայտնել՝ ամրապնդելու կապերը Իրանի հետ և լուծելու թյուրըմբռնումները։

News.am