ԿԳՄՍՆ․ Դպրոցներում ռազմահայրենասիրական միջոցառումները չեն արգելվի

Ռազմահայրենասիրական միջոցառումներ դպրոցներում իրականացվել են, իրականացվում են և կիրականացվեն, խոսքը կրթական հաստատությունների տարածքում ռազմականացված կամ ռազմական կառույցների ստորաբաժանումների տեղակայման արգելքի մասին է։ Sputnik Արմենիայի հետ զրույցում այս մասին ասաց ԿԳՄՍ նախարարության մամուլի քարտուղար Գեղամ Մելիքբեկյանը` անդրադառնալով ԶԼՄ–ներում հրապարակված լուրերին։

Հայտնել ենք, որ մամուլը գրում է, թե ՀՀ ԿԳՄՍ նորանշանակ նախարար Ժաննա Ադրեասյանը հրահանգել է դպրոցներում արգելել բոլոր տեսակի ռազմահայրենասիրական պարապմունքներն ու կրթադաստիարակչական միջոցառումները, ինչը նշանակում է հրաժարվել համագործակցել ռազմական այնպիսի կազմակերպությունների հետ, ինչպիսիք են «Կոմանդոս ռազմամարզական ակումբը», «Զարկ» ծրագիրը, «Փոքր Մհերը», ՈՄԱ (Ողջ մնալու արվեստը) ռամահայրենասիրական հասարակական կազմակերպությունը և այլն:

«Մամուլում շրջանառվում էր, թե իբր Ժաննա Անդրեասյանը նախարար դառնալուց հետո է նման շրջաբերական ուղարկել, այնինչ իրականում նախարարի պաշտոնում նշանակվելուց հետո տիկին Անդրեասյանն «Անվտանգ դպրոցներ» միջազգային հռչակագրի վերաբերյալ որևէ շրջաբերական գրություն ՀՀ հանրակրթական դպրոցներին չի ուղարկել։ Նախարարն ի պաշտոնե շրջաբերական չի ուղարկում։ Ժաննա Անդրեասյանը գրությունը ստորագրել է դեռևս ոլորտը համակարգող նախարարի տեղակալ եղած ժամանակ»,– պարզաբանեց Մելիքբեկյանը։

Նրա տեղեկացմամբ` համապատասխան գրություն մարզպետարաններին, Երևանի քաղաքապետարանին և ԿԳՄՍ նախարարությանը ենթակա դպրոցներին ուղարկվել է վերոհիշյալ հռչակագրի պահանջների ապահովման անհրաժեշտությամբ պայմանավորված, այն է` կրթական հաստատությունները զերծ պահել թիրախավորումից։

ՀՀ–ն «Անվտանգ դպրոցներ» միջազգային հռչակագիրը վավերացրել է դեռևս 2017 թվականին` դառնալով միջազգային մարդասիրական այդ փաստաթղթին միացող 60-րդ երկիրը։ Ներկայում հռչակագրին միացել է 115 պետություն։

«Լուրջ մտահոգություն է առաջացնում այն, որ Ադրբեջանը հրաժարվում է վավերացնել «Անվտանգ դպրոցներ» հռչակագիրը` խաթարելով համաշխարհային կոալիցիայի` զինված բախումների ընթացքում կրթության ոլորտը նպատակային հարձակումներից զերծ պահելու ջանքերը։ 44–օրյա պատերազմի ընթացքում Ադրբեջանն իր հենակետերը տեղադրում էր նաև կրթական հաստատությունների հարևանությամբ` հետագայում դրանց խոցման դեպքում հայկական կողմի հասցեին մեղադրանքներ հնչեցնելու համար»,– ասաց Մելիքբեկյանը։

Մեր զրուցակիցը հավելեց, որ «Նախնական զինվորական պատրաստվածություն» առարկայի դասաժամերը դպրոցներում ավելացվել են ու նաև պետական չափորոշիչի փորձարկման փուլում, որն իրականացվում է Տավուշի մարզի հանրակրթական դպրոցներում, երեխաները գործնականորեն մասնակցում են նաև կազմակերպված ռազմամարզական ճամբարներին։ Այդ փորձը գալիք տարվա ընթացքում աստիճանաբար կտարածվի նաև մյուս մարզերում։