ԱԺ պատմության մեջ առաջին անգամ չէ, որ բարձրաձայնվում է ընդդիմադիր պատգամավորներին մանդատներից զրկելու հարցը․Մինասյան

Ազգային ժողովի պատմության մեջ առաջին անգամ չէ, որ բարձրաձայնվում է ընդդիմադիր պատգամավորներին մանդատներից զրկելու հարցը։ Ակնհայտ է, որ գործող իշխանության համար սա յուրօրինակ գործիքակազմ է, որն ուղղված է ընդդիմախոսների քաղաքական հետապնդումը շարունակելուն։

Այս մասին այսօր՝ հունվարի 12-ին, ԱԺ-ում լրագրողների հետ զրույցում ասաց «Հայաստան» խմբակցության քարտուղար Արծվիկ Մինասյանը՝ մեկնաբանելով ԱԺ նախագահ Ալեն Սիմոնյանի վերջերս արած հայտարարությունը։ Նրա խոսքով՝ խոսքը, մասնավորապես, ինչպես ընդդիմադիր պատգամավորներին, այնպես էլ ընդդիմադիր  խմբակցությունների մասին է։ Պատգամավորը, մասնավորապես, անդրադարձավ այդ հարցի ընդգրկմանը ԱԺ խորհրդի նիստի օրակարգում, որը տեղի կունենա վաղը: «Այո, կարելի է ասել, որ այս հարցը ԱԺ խորհրդի նիստի օրակարգում ընդգրկվել է ավտոմատ կերպով, սակայն կան նաեւ այլ հնարավորություններ։ Օրինակ, եթե խորհուրդը լեգիտիմ հարց է տալիս՝ քվեարկությունների ընթացքում փաստաթղթում նշված բացակայությունները որքանով են համապատասխանում Սահմանադրության եւ գործող օրենսդրության պահանջներին։ Այսպիսով, այստեղ բազմաթիվ հարցեր կան։ Կա նաեւ երկրորդ կարեւոր հանգամանքը։ ԱԺ խորհուրդը կարող է պարզապես չհավաքվել։ Հատկապես, եթե դրա անդամները չեն ցանկանում քննարկման դնել նշված հարցը։ Այսինքն՝ այս հարցը կարելի է պարզապես փակել։ Սակայն որոշումը նրանցն է։ Ինչ ուզում են, թող որոշեն։ Մենք դա մի կողմից կգնահատենք որպես գործող իշխանության վարք, մյուս կողմից՝ որպես գործող օրենսդրության անկատարության խեղաթյուրված պատկերացում»,-նշեց Մինասյանը։

News.am