Փաշինյան․ Ադրբեջանը նպատակ ունի խափանել խաղաղության օրակարգը

ԼՂ հայությանն իրենց տներից արտաքսելը Ադրբեջանի միակ նպատակը չէ, այս սադրիչ գործողություններով Ադրբեջանը նպատակ ունի խափանել նաև խաղաղության օրակարգը, խաղաղության բանակցային գործընթացը և նոր պատերազմ հրահրել տարածաշրջանում: Այս մասին այսօր՝ հունվարի 26-ին, կառավարության նիստում հայտարարեց ՀՀ վարչապետ Նիկոլ Փաշինյանը:

«Հասկանալի է, որ Լաչինի միջանցքի փակման և ԼՂ-ում հումանիտար ճգնաժամը մենք բոլորս շատ էմոցիոնալ ենք տանում, բայց կրկին պետք է ընդգծեմ այս իրավիճակի շուրջ զսպվածության անհրաժեշտությունը, և խաղաղության օրակարգին հակասող բառապաշարի ու գործողությունների բացառումը առավել ևս պետական իշխանության ներկայացուցիչների կողմից:

Մենք շարունակում ենք հետևողական լինել խաղաղության օրակարգի առաջմղման մեր ջանքերում և որևէ սադրանքով մեզ հնարավոր չպետք է լինի շեղել այս օրակարգից:

Միաժամանակ, պետք է շարունակել մեր համատեղ ջանքերը, համատեղ ասելով նկատի ունեմ իշխանություն, ընդդիմություն, քաղհասարակություն, հայաստանյան և Սփյուռքի անհատներ ու կազմակերպություններ, ԼՂ հայության իրավունքների ու անվտանգության նկատմամբ իրականացվող ոտնջգությունների վրա միջազգային ուշադրություն կենտրոնացնելու ուղղությամբ»,-ասաց Փաշինյանը:

Նա շնորհակալություն հայտնեց երկրներին ու կառույցներին, որոնք իրավիճակին արձագանքում են օբյեկտիվորեն ու անկողմնակալ՝ հենվելով մարդու իրավունքների և երկրների ստանձնած միջազգային պարտավորությունների վրա:

«Ընդհանուր առմամբ մեր տարածաշրջանում առկա խնդիրների խաղաղ կարգավորումը այլընտրանք չունի, և մենք առաջնորդվելու ենք այս տրամաբանությամբ, որքան էլ հասկանում ենք բոլոր բարդություններն ու դժվարությունները»,-ընդգծեց վարչապետը:

News.am