Последние новости

Արևմտյան Ամերիկայի ազգային երեք կուսակցությունների հայտարարությունը

Հունվարի 27-ին, ՌԱԿ-ի գրասենյակում, ՍԴՀԿ-ի, ՀՅԴ-ի և ՌԱԿ-ի Արևմտյան Ամերիկայի ղեկավարության ներկայացուցիչների հանդիպման ընթացքում քննարկվել է արցախահայության օրըստօրե սրվող տագնապալի իրավիճակը և հայկական համայնքային ազգային կյանքի հուզող հարցերը։

ՍԴՀԿ-ից հանդիպմանը մասնակցում էր ատենապետ Վազգեն Խոտանյանն ու Միհրան Խաչատուրյանը, ՀՅԴ-ից՝ ատենապետ Տարոն Տեր-Խաչատուրյանը և Գարեգին Խանջյանը, ՌԱԿ-ից՝ ատենապետ, դոկտՐաֆֆի Պալյանը և Կարո Քյուփելյանը։

Շեշտադրվեց ազգային դատն առանց ընկրկումի հետապնդելու, ինչպես նաև հայոց պետականությունն ու անկախությունն առավելագույն ուժերի լարումով և նպատակասլաց աշխատանքով պահպանելը։ Ցեղասպան Թուրքիայի և նրա գործընկեր Ադրբեջանի հայաջինջ քաղաքականությունը առկա է նաև այսօ՛ր։ Պարտավոր ենք ի նպաստ արցախահայությանը մեր անմիջական զորակցությունը հայտնել՝ ճգնաժամը բարձրացնելով տեղական, նահանգային և դաշնակցային մակարդակների վրա, պահանջելով ԱՄՆ-ից շտապ միջամտություն ցուցաբերել Բերձորի միջանցքի վերաբացման ուղղությամբ։

Հանդիպման ընթացքում որոշվեց նախորդ տարիներին հաստատված ավանդությամբ և միացյալ ճիգերով նոր թափ հաղորդել գաղութային կառույցներին (AGC, UACLA)՝ կազմակերպելու 2023 թվականի ապրիլյան ոգեկոչումները։Նախապատրաստվում է նաև երեք կուսակցությունների համատեղ ճիգերով ազգային այլ օրակարգեր առաջ տանել։

Հայ ազգն ու հայրենիքը գոյութենական պայքարի մեջ են։ Բոլորի՛ս ճիտին պարտքն է միասնական շարքերով ծառայել հայրենիքին ու հայության: Արդ, մեր կոչն է բոլորիդ համախմբվել մեր ազգային ու միութենական կառույցներուն շուրջ, զերծ մնալ հատվածական հաշիվներից, գերադասել ազգայինն ու մեր իրավունքները, և բերել ձեր մասնակցությունն ազգի անվտանգության և բարօրության օգտին:

ՍԴՀԿ Արևմտյան Ամերիկայի Վարիչ Մարմին

ՀՅԴ Արևմտյան Ամերիկայի Կենտրոնական Կոմիտե

ՌԱԿ Արևմտյան Ամերիկայի Շրջանային Վարչություն

News.am

ПОСЛЕДНИЕ ОТ АВТОРА

ПОСЛЕДНЕЕ ПО ТЕМЕ