ՀՅԴ-ական երիտասարդներն Արցախի շրջափակման հարցով բողոքի ակցիաներ են արել մի շարք երկրներում

ՀՅԴ–ի աշխարհասփյուռ կառույցները շարունակում են իրենց ձայնը բարձրացնել աշխարհի տարբեր անկյուններում` ի աջակցություն Արցախի և արցախահայության: ՀՅԴ–ի ֆեյսբուքյան էջից տեղեկանում ենք, որ Արցախի 100-օրյա շրջափակման կապակցությամբ ՀՅԴ Շվեդիայի Երիտասարդական միությունը երեկ բողոքի ակցիա է իրականացրել Ստոկհոլմում:

«Այսօր 100 օրն է, ինչ Արցախի 120 հազար հայեր արգելափակվել են Ադրբեջանի կողմից: Դադարեցրե՛ք Արցախի էթնիկ զտումը: Բացե՛ք Լաչինի միջանցքը», – պահանջել են ցուցարարները:

Միաժամանակ Ֆրանսիայի ՀՅԴ «Նոր սերունդ» կազմակերպության անդամները բողոքի ակցիա են իրականացրել Փարիզում Ադրբեջանի դեսպանատան դիմաց` դատապարտելով Ադրբեջանի քաղաքականությունը, որի բռնապետական ռեժիմը շրջափակման մեջ է պահում 120 000 հայերին: Նրանք եռագույն ծխագլաններ են արձակել։

Բացի այդ, ՀՅԴ Զավարյան ուսանողական միության և ՀՅԴ Լիբանանի երիտասարդական միության անդամները Լիբանանում այցելել են տեղի այլ 6 երկրների դեսպանատներ` ԱՄՆ–ի, Ֆրանսիայի, Ռուսաստանի, Գերմանիայի, Նիդերլանդների և Շվեյցարիայի, ինչպես նաև Լիբանանում ԵՄ և ՄԱԿ-ի ընդհանուր քարտուղարի հատուկ ներկայացուցիչի գրասենյակներ։ ՀՅԴ–ականները նամակ են հանձնել վերոհիշյալ կառույցների ներկայացուցիչներին։

Հավելենք, որ ՀՅԴ Հայաստանի երիտասարդական միությունն այսօր բողոքի ակցիա է կազմակերպում ՀՀ կառավարության շենքի դիմաց: Ակցիան կրկին վերաբերում է Արցախի շրջափակմանը:

Sputnik Արմենիա