Կոնստանտին Զատուլինը հաստատել է, որ Լուկաշենկոն հիվանդ է

Բելառուսի նախագահ Ալեքսանդր Լուկաշենկոն Պետական դրոշի, զինանշանի և օրհներգի օրը չի ներկայացել հանրությանը, տեղեկացրել են բելառուսական և միջազգային մի քանի պարբերականներ և բլոգներ։

Շնորհավորանքը Լուկաշենկոյի անունից հրապարակվել է նախագահի կայքում, բայց տոնական արարողության ժամանակ այն ընթերցել է վարչապետ Ռոման Գոլովչենկոն։

Ինչպես նշել է «Սպեկտր» պարբերականը, վերջին երկու տարիներին Լուկաշենկոն անձամբ է ներկա եղել այս տոնակատարությանը։ Նախկինում այս տոնը կոչվում էր «Պետական զինանշանի և պետական դրոշի օր», բայց ապրիլի 12-ին անվանման մեջ ավելացվել է օրհներգ բառը։

Վերջին անգամ Բելառուսի նախագահը հանրության մեջ հայտնվել է մայիսի 9-ին, Մոսկվայում, Հաղթանակի զորահանդեսում։

Այն ժամանակ լրագրողներն ուշադրություն էին դարձրել այն հանգամանքին, որ Ալեքսանդր Լուկաշենկոյի հետ ինչ-որ բան այնպես չէ։ Նա թորշոմած տեսք ուներ, չկարողացավ անցնել 300 մետր Կարմիր հրապարակով, ստիպված էր օգտվել էլեկտրամեքենայից։

Ձեռքին վիրակապ կար, որը սովորաբար դրվում է, երբ ներերակային միացում է արվում։ Լուկաշենկոն չի մնացել Վլադիմիր Պուտինի և Մոսկվա եկած մյուս ղեկավարների հետ ճաշին։

Երեկոյան նա թռել է Մինսկ և հակառակ ավանդույթի՝ ելույթ չի ունեցել մայիսի 9-ի հանդիսավոր արարողությանը։ Լուկաշենկոյի փոխարեն, բայց նրա հանձնարարությամբ, նրա ելույթն ընթերցել է պաշտպանության նախարար Վիկտոր Խրենինը։

Դումայի ԱՊՀ գործերի կոմիտեի ղեկավարի առաջին տեղակալ Կոնստանտին Զատուլինը հաստատել է «Պոդյոմ» պարբերականին, որ Լուկաշենկոն հիվանդ է, բայց թե ինչով՝ չի ասել։

«Այնտեղ գերբնական որևէ բան չկա, քովիդ չէ։ Պարզապես մարդը հիվանդացել է։ Չնայած մարդը հիվանդացել է, իր պարտքն է համարել գալ Մոսկվա, իսկ հետո նույն օրը երեկոյան միջոցառում է անցկացրել Մինսկում։ Հավանաբար, որոշակի հանգստի կարիք ունի, այս է ամենը»,- ասել է Զատուլինը։

Այլ ԶԼՄ-ները ավելի վաղ տեղեկացրել էին, որ Լուկաշենկոյի օրգանիզմում լուրջ խանգարում է եղել, որն առաջ է բերել էնդոկրին համակարգի և սրտի հիվանդություններ։ Լուկաշենկոյի բուժման համար բազմիցս Մինսկ են մեկնել բժիշկներ Մոսկվայից, մասնավորապես՝ Բակուլևի անվան կենտրոնից։

News.am