Բելգորոդի մարզում գնդակոծության հետևանքով զոհ և վիրավորներ կան

Ուկրաինայի զինված ուժերը հրետակոծել են ժամանակավոր տեղակայման կետը, որտեղ խաղաղ բնակիչներ են եղել՝ ծերեր և երեխաներ, մեկ մարդ մահացել է, ևս երկուսը` վիրավորվել։ Տեղեկությունը հայտնում է ՌԴ Բելգորոդի մարզի ղեկավար Վյաչեսլավ Գլադկովը։

Ավելի վաղ մարզպետը տեղեկացրել էր Ուկրաինայի զինված ուժերի կողմից ժամանակավոր տեղակայման կետի գնդակոծման մասին՝ նշելով, որ մեկնում է դեպքի վայր:

«Մահացել է Վիտալի Ալեքսեևիչը՝ այդ հաստատության պահակը։ Եվս երկու մարդ վիրավորվել է։ Նրանք ծանր վիճակում գտնվում են վերակենդանացման բաժանմունքում` մի տղամարդ՝ որովայնի խոռոչի թափանցող վերքերով, մյուսը՝ կրծքավանդակի թափանցող վերքերով։ Նրանց վիրահատել են, ցուցաբերվում է անհրաժեշտ բուժօգնություն»,-նշել է մարզի ղեկավարը Twitter–ում։

Նրա խոսքով՝ երեք ուղիղ հարվածները դիպել են բնակելի և վարչական մասնաշենքին, ինչպես նաև միջանցքի տարածքին։ Տանիքը կոտրվել է, պատուհանների շրջանակներն ու ապակիները կոտրվել են: Վնասվել է նաև երկու մարդատար ավտոմեքենա։ ⠀

Գլադկովը հայտնել է, որ ժամանակավոր տեղակայման կետում էին գտնվում նաև Սերեդայի բնակիչները:

«Անմարդկային փորձություններ են նրանց բաժին հասել։ Ավելի քան մեկ տարի է, ինչ նրանք տեղահանված են իրենց բնակավայրից։ Շրջանի ղեկավար Վլադիմիր Նիկոլաևիչ Ժդանովը, բնակավայրի ղեկավար Գալինա Իվանովնա Ռուդենկոն և օպերատիվ ծառայությունները հնարավորինս օպերատիվ կերպով բնակիչներին տեղափոխել են մեկ այլ բնակավայր: Դիմավորեցի ժամանակավոր տեղակայման կետից եկած ավտոբուսները։ Բնակիչներից ոմանք վատ էին զգում․ մեկի սիրտն էր վատացել, մյուսը ճնշում ուներ։ Շտապօգնության բրիգադները անհրաժեշտ օգնություն ցուցաբերեցին»,- գրել է մարզպետը։

Հիշեցնենք` մայիսի 27-ին հայտնի դարձավ, որ Բելգորոդի մարզի Շեբեկինո քաղաքը հրետակոծվել է Ուկրաինայի զինված ուժերի կողմից, մեկ մարդ մահացել է, տուժածների թվում երկու դեռահաս կա։

Sputnik Արմենիա