Բլինքեն․ Ռուսական ճգնաժամը ցույց տվեց Պուտինի իշխանության համակարգի «իրական ճեղքերը»

Պետքարտուղար Էնթոնի Բլինքենն ասել է, որ Կրեմլի դեմ «Վագներ» ՄՌԿ-ի վարձկանների խռովության փորձի հետ կապված ռուսական ճգնաժամը բացահայտեց Ռուսաստանի նախագահ Վլադիմիր Պուտինի իշխանության համակարգի «իրական ճեղքերն» այն ​​բանից հետո, երբ նա ստիպված եղավ խռովարարների առաջնորդին ներում շնորհելու համար գործարքի գնալ:

Մի շարք հեռուստահարցազրույցներում Բլինքենը հիշեցրել է, որ լարվածությունը, որը հանգեցրեց Եվգենի Պրիգոժինի գլխավորած «Վագների» խռովությանը, ավելանում էր ամիսներ շարունակ, և որ անկարգությունները կարող են ազդել Ուկրաինայում մարտական գործողություններ անցկացնելու Մոսկվայի կարողության վրա:

«Մեր ուշադրությունը կենտրոնացած է Ուկրաինայի վրա, որպեսզի երաշխավորենք, որ նա ունի անհրաժեշտ ամեն ինչ իրեն պաշտպանելու և Ռուսաստանի կողմից գրավված տարածքները վերադարձնելու համար», - NBC հեռուստաալիքի Meet the Press-ի եթերում ասել է Բլինքենը:

«Մենք տեսնում ենք, որ ռուսական համակարգի ճեղքերը ջրի երես են դուրս գալիս։ Դեռ շատ վաղ է ասել, թե ինչպես և երբ դա կավարտվի։ Բայց, իհարկե, կան բազմաթիվ նոր հարցեր, որոնց Պուտինը պետք է պատասխանի առաջիկա շաբաթների և ամիսների ընթացքում»,- պարզաբանել է պետքարտուղարը։

Նույն օրը, ABC հեռուստաալիքի եթերում, նա ասել է, որ պառակտումն ու խառնաշփոթը Ռուսաստանում «կարող են դժվարացնել» Ուկրաինայում ռուսական զորքերի ռազմական գործողությունները։

CBS-ին տված հարցազրույցում Բլինքենն արձանագրել է, որ «Վագներ» խմբավորումը և նրա առաջնորդ Եվգենի Պրիգոժինը հանգստյան օրերին «ուղիղ մարտահրավեր են նետել Պուտինի իշխանությանը»:

«...Դա ցույց է տալիս խորը խնդիրները, ցուցադրում իրական ճեղքերը», - ասել է Բլինքենը:

Ըստ պետքարտուղարի՝ Պրիգոժինի գլխավորած «Վագների» զինյալների կողմից Պուտինի իշխանությանը նետված աննախադեպ մարտահրավերի հետևանքով առաջացած ցնցումները հնարավոր է դեռ չեն ավարտվել և կարող են ձգվել շաբաթներով կամ նույնիսկ ամիսներով:

Բլինքենն ասել է, որ նախագահի հանձնարարությամբ նա իր թիմին հանձնարարել է համագործակցել ռուսական կողմի հետ՝ ամերիկյան անձնակազմի, ինչպես նաև Ռուսաստանում գտնվող ԱՄՆ-ի բոլոր քաղաքացիների պաշտպանությունը ապահովելու համար։

«Նախագահը երեկ հավաքել է ոչ միայն Ազգային անվտանգության խորհրդին, այլ նաև մեր հիմնական դաշնակիցների և գործընկերների ղեկավարներին», - ասել է Բլինքենը: «Նա բոլորիս հրահանգեց անել նույնը։ Մենք ունենք նպատակների և գործողությունների մեծ միասնություն, երբ խոսքը վերաբերում է Ուկրաինային աջակցելուն և հենց դրա վրա ենք մենք կենտրոնացած»:

ABC հեռուստաալիքում ելույթի ժամանակ Բլինքենն ասել է, որ ռուսական ճգնաժամի «վերջնական ակտը» դեռ չի հասել:

«Դեռ վաղ է դատել, թե ինչպես ամեն ինչ կավարտվի «Վագներ»-ի զինյալների համար»,- մանրամասնել է նա։

Պետքարտուղարության ղեկավարը նշել է, որ նախագահ Ջո Բայդենը չի փորձել կապ հաստատել Պուտինի հետ՝ ընդգծելով, որ Ռուսաստանում անկարգությունները նրա «ներքին գործն են» և հավելել, որ ամերիկյան միջուկային դոկտրինում փոփոխություններ չեն եղել։

News.am