Երևան-Կապան թռիչքի տոմսերն արդեն վաճառքում են

Արդեն վաճառքում են Երևան–Կապան–Երևան թռիչքի տոմսերը։ Տեղեկությունը հայտնում է Սյունիքի մարզպետարանը ֆեյսբուքյան պաշտոնական էջում։

Մի ուղղությամբ տոմսի արժեքը` սկսած 20.000 ՀՀ դրամից։

Նշենք, որ կանոնավոր թռիչքներն իրականացվելու են շաբաթական երկու անգամ` երկուշաբթի և ուրբաթ օրերին։ Երևանից թռիչքն առավոտյան 8։00-ին է, Կապանից` 10։00-ին։

Հիշեցնենք` օգոստոսի 19-ին` Կապան քաղաքի օրվա առիթով, չեխական «ՆովԷյր» ավիաընկերության L-410 տիպի քաղաքացիական օդանավը իրականացրեց ուղևորափոխադրում Երևան-Կապան-Երևան երթուղով:

Իսկ օգոստոսի 17-ին Երևան–Կապան չվերթով Սյունիք է մեկնել նաև ՀՀ վարչապետ Նիկոլ Փաշինյանը։ Հաջորդ օրը` օգոստոսի 18-ին, ՀՀ ԱԱԾ–ն հայտնեց, որ ադրբեջանական կողմից անհայտ անձը կրակոցներ է արձակել Կապանի «Սյունիք» օդանավակայանի ուղղությամբ, փամփուշտներից երկուսը վնասել են օդանավակայանի պատուհաններից մեկը և տանիքը։

Օգոստոսի 18-ին Ադրբեջանի խորհրդարանի պաշտպանության հանձնաժողովի ղեկավար Զիյաֆեթ Ասկերովը հայտարարել էր, որ Կապանի օդանավակայանը չի կարող շահագործվել, քանի որ դրա համար Հայաստանը չունի համաձայնագիր Ադրբեջանի հետ, բացի այդ՝ այն ադրբեջանական սահմանային դիրքերին մոտ է գտնվում:

Ավելի ուշ ՀՀ քաղավիացիայի կոմիտեն հայտարարություն տարածեց, որում նշվում էր, որ համաձայն Միջազգային քաղաքացիական ավիացիայի կոնվենցիայի՝ յուրաքանչյուր ինքնիշխան պետություն ինքնուրույն է տնօրինում իր օդային տարածքը և տվյալ պետության տարածքում իրականացված թռիչքները չեն համաձայնեցվում հարևան երկրների հետ:

Նաև հիշեցրել էին, որ 2020 թվականին, երբ վերաբացվեց Կապանի «Սյունիք» օդանավակայանը, ներդրվեցին ժամանակակից նոր օդային սխեմաներ՝ համաձայն որի մոտեցումները, վերթիռներն ու վայրէջքները իրականացվում են բացառապես Հայաստանի օդային տարածքով։

Sputnik Արմենիա