ՔՊ-Ն «ԶՈՌԲԱՅՈՒԹՅԱՄԲ» ՈՒԶՈՒՄ Է ԻՇԽԱՆՈՒԹՅՈՒՆ ՎԵՐՑՆԵԼ ՆԱև ԳՅՈՒՄՐՈՒՄ. «Ժողովուրդ»

ՀՀ վարչապետ Նիկոլ Փաշինյանի թիմակիցները Գյումրիում ճնշում են «Բալասանյան» դաշինքին (որը Գյումրիում կառավարող ուժն է), որպեսզի հրաժարվի իշխանությունից ու դառնա ընդդիմություն, գրում է «Ժողովուրդ» օրաթերթը:

«Ժողովուրդ» օրաթերթի տեղեկություններով՝ գործարար, դաշինքի առաջնորդ Սամվել Բալասանյանին պատկանող գրեթե բոլոր բիզնեսներում ստուգումներ են սկսվել, քանի որ իշխանականներն իրավապահ համակարգին հրահանգել են ամեն գնով քրգործ հարուցել Բալասանյանների նկատմամբ։

«Ստացվում է՝ ամեն օր ժողովրդավարության մասին պատմություններ հյուսող ՔՊ-ն «զոռբայությամբ» ուզում է իշխանություն վերցնել նաև Գյումրում և ստիպում է այնտեղ իշխող ուժին (որին ժողովրդի մեծամասնությունն է ձայն տվել) դառնալ ընդդիմություն»:

Նշենք, որ 2021թ.-ի ՏԻՄ ընտրությունների ժամանակ «Բալասանյան» դաշինքը հաղթել էր ՔՊ-ին՝ ստանալով քվեների 36,59 տոկոսը, իսկ ՔՊ-ն՝ 29,56 %:

Հայտնել էինք նաև, որ իշխանությունները 2023–ի դեկտեմբերի 29-ին Սամվել Բալասանյանի որդուն՝ Միսակ Բալասանյանին, հետ են կանչել Իրաքում ՀՀ դեսպանի պաշտոնից:

Վերջինս այդ պրոբլեմատիկ երկրի կարևոր պաշտոնում նշանակվել էր 2023 թվականի սեպտեմբերի 5-ից, այսինքն՝ ընդամենը 4 ամիս է պաշտոնավարել:

«Ստացվում է՝ իրենց քմահաճույքի ու ընդդիմադիրների հետ հաշվեհարդար տեսնելու համար ՔՊ-ականները ոչնչի առջև չեն կանգնում, պատրաստ են զոհել ամեն ինչ, անգամ՝ ՀՀ պետական շահն ու արտաքին իմիջը»,–գրում է թերթը:

Մանրամասները՝ «Ժողովուրդ» օրաթերթի այսօրվա համարում:

Sputnik Արմենիա