Ամփոփվել են ակադեմիկոս Մառի անվան երկրորդ հայագիտական մրցույթի արդյունքները

Ամփոփվել են ակադեմիկոս Ն․Յ․ Մառի անվան անվան հայագիտական երկրորդ մրցույթի արդյունքները: Տեղեկությունը հայտնում է Երևանում Ռուսական տունը:

Եզրափակիչ են դուրս եկել Մախաչկալայի, Վլադիկավկազի, Սմոլենսկի, Սարանսկի և Մոսկվայի հինգ հետազոտողներ, որոնց աշխատանքները փոխանցվել են համաշխարհային մակարդակի հեղինակավոր գիտնականների՝ փակ գրախոսման համար:

Լավագույն է ճանաչվել գիտնական Շախբան Խապիզովի (Մախաչկալա) «Վարաչան քաղաքը և հոների թագավորությունը Արևելյան Կովկասում հայկական աղբյուրների լույսի ներքո» հետազոտությունը: Ձեռագիրը կհրատարակվի, իսկ հեղինակը կհրավիրվի Հայաստան և կպարգևատրվի Մառի անվան ոսկե մեդալով։

«Խապիզովի ուսումնասիրությունը դաղստանցի գիտնականի տպավորիչ աշխատանքն է՝ հիմնված ոչ միայն աղբյուրների, այլև կողմնակի տվյալների վրա։ Հեղինակից մեծ ջանքեր են պահանջվել պատմության մի ամբողջ շերտ վերականգնելու համար։ Ներկայացված աշխատանքը ռուսական հայագիտության լավագույն ավանդույթների շարունակման լավ օրինակ է»,- ասել է Արևելագիտության ինստիտուտի տնօրեն, բ.գ.դ., պրոֆեսոր Գառնիկ Ասատրյանը:

Երկրորդ տեղը զբաղեցրել է Անդրեյ Դոնչենկոյի (Վլադիկավկազ) «Մեր Օսեթիան. Էրեբունի. ՀՕՀ-Ալանիա հայկական ազգային-մշակութային հասարակական կազմակերպության 30-ամյակի առթիվ» հետազոտությունը, երրորդը Սմոլենսկի պետական համալսարանի երիտասարդ հետազոտողների «Հայկական տեքստը ռուս գրականության մեջ» ժողովածուն է:

Մրցույթին կարող էին մասնակցել Հայաստանից դուրս բնակվող հայագետ հետազոտողները՝ ներկայացնելով ռուսերեն լեզվով բնօրինակ գիտական աշխատություններ, ձեռագիր կամ վերջին 3 տարվա ընթացքում հրապարակված:

Ակադեմիկոս Նիկոլայ Մառը ծանրակշիռ ներդրում է ունեցել Ռուսաստանում հայագիտության զարգացման գործում։

Sputnik Արմենիա