Երևանում ակցիայի ժամանակ ոստիկանի դեմքին արցունքաբեր գազ փչած տղամարդը կալանավորվել է

Երևանում «Տավուշը հանուն հայրենիքի» շարժման անհնազանդության ակցիայի ժամանակ ոստիկաններից մեկի դեմ արցունքաբեր գազ կիրառած տղամարդը կալանավորվել է։ Տեղեկությունը հայտնում է ՀՀ քննչական կոմիտեն։

Մայիսի 27-ին՝ ժամը 10:30-ի սահմաններում, Երևանի Աբովյան-Սայաթ-Նովա փողոցների խաչմերուկում մի շարք քաղաքացիներ անհնազանդության ակցիաներ էին իրականացնում` արգելափակելով ճանապարհի երթևեկելի հատվածը: Նշված վայրում ծառայություն իրականացնող ՀՀ ՆԳՆ ոստիկանության տարբեր ստորաբաժանումների ծառայողները պահանջում էին բացել ճանապարհը։

«Այդ ժամանակ տվյալ տարածքում է գտնվել նաև Երևան քաղաքի 54-ամյա բնակիչը, որը, քննության տվյալներով, չի հանդիսացել անհնազանդության գործողություններ կատարող: Երբ ՀՀ ՆԳՆ ոստիկանության պարեկային ծառայության աշխատակիցը մոտեցել է անհնազանդության ակցիա իրականացնող քաղաքացիներին և ցանկացել իր օրինական ծառայողական գործունեության շրջանակներում իրականացնել վարչական ձերբակալում, 54-ամյա տղամարդը հանել է իր մոտ պահվող արցունքաբեր գազաբալոնը և այն փչել ոստիկանության ծառայողի դեմքին՝ վերջինիս առողջությանը պատճառելով վնաս՝ բռնություն գործադրելով նրա նկատմամբ»,–նշված է հաղորդագրության մեջ:

Տղամարդը տեղափոխվել է ոստիկանության բաժին, և որտեղ խուզարկել են նրան և հայտնաբերել «Շոկ» գրառմամբ արցունքաբեր գազաբալոն:

Ձեռք բերված բավարար փաստերի հիման վրա տղամարդուն մեղադրանք է ներկայացվել ՀՀ քրեական օրենսգրքի 452-րդ հոդվածի 4-րդ մասի հատկանիշներով (պաշտոնատար անձի օրինական ծառայողական կամ քաղաքական գործունեությանը միջամտելը)։

Միջնորդություն է ներկայացվել դատարան՝ նրա նկատմամբ որպես խափանման միջոց կալանավորում կիրառելու վերաբերյալ, ինչը բավարարվել է:

Նախաքննությունը շարունակվում է:

Sputnik Արմենիա