Կառավարությունը մրցույթ կհայտարարի Երևանի հայտնի ԱՕԿՍ-ի շենքի վարձակալության համար

ՀՀ կառավարությունը մրցույթ կհայտարարի Երևանի կենտրոնում գտնվող հայտնի ԱՕԿՍ-ի շենքի վարձակալության համար։ Մրցույթ հայտարարելու որոշումն ընդունվել է կառավարության այսօրվա նիստում։

«ԱՕԿՍ–ի շենքը վարձակալության կտրվի 10 տարի ժամկետով։ Գույքը գնահատվել է ամսական 15 մլն 450 000 դրամ»,– կառավարության նիստում ասաց ՀՀ տարածքային կառավարման և ենթակառուցվածքների նախարար Գնել Սանոսյանը։

Աբովյան փողոցում գտնվող շենքը, որը կառուցվել է 1910-ականներին, պատկանում էր բժիշկ Հովհաննես Հովհաննիսյանին, իսկ խորհրդային տարիներին այստեղ էր գտնվում Արտասահմանյան երկրների հետ բարեկամության և մշակութային կապի հայկական ընկերություն, հայտնի` «ԱՕԿՍ–ի շենք» անունով։

Նշենք, որ այս շենքի հետ կապված դատական գործում ներգրավված էին նաև 2012-2016 թթ. ՀՀ մշակույթի նախարարի պաշտոնը զբաղեցրած Հասմիկ Պողոսյանը, որը, ըստ մեղադրանքի, օժանդակել է «Երևանի Պ.Չայկովսկու անվան միջնակարգ երաժշտական դպրոց» ՊՈԱԿ-ին անհատույց օգտագործման իրավունքով տրամադրված՝ Երևանի Կողբացի 36 հասցեում գտնվող հողամասից առանձնացված 300 քառակուսի մետր մակերեսով տարածքը արտակարգ և լիազոր դեսպան Ա.Ս.–ի (խմբ. Իսրայելում և ՌԴ–ում ՀՀ նախկին դեսպան Արմեն Սմբատյան) կազմակերպած ու ղեկավարած հանցավոր խմբի կողմից խարդախությամբ հափշտակելուն: Արդյունքում պետությանը պատճառվել է 100 մլն դրամի գույքային վնաս:

«Արտասահմանյան երկրների հետ մշակութային կապի և համագործակցության հայկական ընկերություն» ՀԿ-ի որոշմամբ հիմնադրված «ԱՕԿՍ» ՍՊԸ-ի 100 տոկոս բաժնեմասը 550 000 դոլարով ձևական գործարքի արդյունքում օտարել են օֆշորում՝ Բրիտանական Վիրջինյան կղզիներում գրանցված ընկերությանը։ Դրա տնօրենն է հանդիսացել Հասմիկ Պողոսյանի որդու կինը՝ Ֆրանչեսկա Կուտրուպին։

2023–ի սեպտեմբերի 9–ին ԱՕԿՍ–ի շենքի սեփականության իրավունքը փոխանցվեց Հայաստանի Հանրապետությանը։

Sputnik Արմենիա