Ֆրանսիայի խորհրդարանական ընտրություններում հաղթել են ձախերը

Ֆրանսիայի խորհրդարանական ընտրություններում հաղթանակ է տարել «Նոր ժողովրդական ճակատ» ձախ կուսակցությունների կոալիցիան՝ Ժան Լյուկ Մելանշոնի գլխավորությամբ ստանալով 182 տեղ, հայտնում է Monde պարբերականը։

Երկրորդ տեղը զբաղեցրել Է Մակրոնի կոալիցիան՝ 168 տեղ։ Երրորդը Մարին Լը Պենի «Ազգային միավորումն» է 143 տեղով։

Մելանշոնն արդեն հայտարարել է, որ իր քաղաքական ուժը մտադիր չէ կոալիցիա կազմել Էմանուել Մակրոնի դաշինքի հետ: Ավելի վաղ նա Ֆրանսիայի նախագահին կոչ էր արել ընտրություններում առաջատար դաշինքին հանձնարարել կառավարություն ձևավորել:

Մակրոնն իր հերթին որոշել է հուլիսի 7-ին Ֆրանսիայի խորհրդարանի արտահերթ ընտրությունների արդյունքներով ազգին ուղղված ուղերձով հանդես չգալ։ Նշվում է, որ Ֆրանսիայի նախագահը կսպասի նոր Ազգային ասամբլեայի «կառուցմանը», որպեսզի անհրաժեշտ որոշումներ կայացնի:

Աջ ուժերի երրորդ տեղը անակնկալ էր, քանի որ առաջին փուլում Մարին Լը Պենի «Ազգային միավորում» կուսակցությունը և նրա դաշնակիցները ստացան 33%: Վերջին հարցումների համաձայն ՝ հենց Լը Պենն է եղել նախընտրական արշավի ֆավորիտը, նրան հաղթանակ էին կանխատեսում։

Ֆրանսիական TF1-ին տված հարցազրույցում քաղաքական գործիչը նշել է, որ ինքը շատ հիասթափություններ է ունեցել, ու հիմա այս արդյունքն ինքը դիտում է որպես ապագա հաղթանակի հետաձգում։

«Ես չափազանց հիասթափեցնող փորձ ունեի հիասթափվելու համար, երբ մենք կրկնապատկեցինք մեր տեղերի քանակը: Ես երկու տարի առաջ խորհրդարանի անդամ էի, և մենք յոթն էինք։ Այդ պատճառով ես հիմա խոսում եմ առաջընթացի մասին: Չնայած մյուս բոլոր կուսակցությունների կոալիցիային, լրատվամիջոցների աջակցությամբ, որոնք հստակ դիրքորոշում են որդեգրել, մենք ամենամեծ կուսակցությունն ենք ձայների և տեղերի քանակով։ Իրավիճակը թափ է հավաքում, և մեր հաղթանակը միայն հետաձգվեց», - հայտարարել է նա։

Ֆրանսիայի խորհրդարան են անցել ևս 3 քաղաքական ուժ՝ ընդհանուր հաշվով ստանալով պատգամավորական 73 տեղ։

Հիշեցնենք՝ հունիսի 30-ին տեղի ունեցած ընտրությունների առաջին փուլում մասնակցությունը ռեկորդային է եղել՝ գերազանցելով 66 տոկոսը։ Աջակողմյան «Ազգային միավորում» կուսակցությունը Հանրապետականների կուսակցության դաշնակիցների հետ միասին հավաքել էր ձայների 33,15 տոկոսը, ձախակողմյան «Նոր ժողովրդական ճակատ» դաշինքը ստացել էր 27,99 տոկոսը, նախագահ Էմանուել Մակրոնի կոալիցիան երրորդն էր 20,04 տոկոսով:

Ֆրանսիայի խորհրդարանական տեղերը 577-ն են։

Sputnik Արմենիա