Բաշար ալ-Ասադը հրաժարական տալուց հետո առաջին հայտարարությունն է արել

Սիրիայի հեռացող նախագահ Բաշար ալ-Ասադը Դամասկոսում մնացել է մինչև դեկտեմբերի 8-ի վաղ առավոտը, երբ զինված ընդդիմությունը մտել է քաղաք. նա լքել է երկիրը միայն նույն օրը երեկոյան, երբ փաստացի կորցրել էր վերահսկողությունը երկրի մնացած տարածքի վրա։ Այս մասին Ասադն ասել է հայտարարությունում։

«Ասադը մտադիր չէր հրաժարական տալ և չէր մտածում ահաբեկչական հարձակման օրերին ապաստան խնդրելու մասին (...) Այնուամենայնիվ, նախագահի համար իշխանությունը զավթելուց հետո երկրում մնալն անիմաստ դարձավ», - ասվում է հայտարարության մեջ:

Նշվում է, որ Ասադը ճանաչել է կառավարական սիրիական արաբական բանակի և պետական ​​կառավարման համակարգի փլուզումը, ինչը, ըստ նրա, հանգեցրել է իր հրաժարականի որոշմանը, գրում է lenta.ru-ն։ Բացի այդ, նա նշել է, որ սկզբում գնացել է Հմեյմիմ, իսկ այնտեղից թռել է Ռուսաստան՝ իմանալով Դամասկոսի վերջնական անկման մասին։

Ասադի հեռանալը Սիրիայից պլանավորված չէր և տեղի չունեցավ մարտերի վերջին ժամերին, ասվում է հայտարարության մեջ, փոխանցում է RTVI-ն։ Այն բանից հետո, երբ ապստամբները մտան Դամասկոս, նախկին նախագահը, «ռուս դաշնակիցների հետ համակարգմամբ», տեղափոխվեց Լաթաքիա՝ հետևելու ռազմական գործողություններին:

«Այդ առավոտյան «Հմեյմիմ» ավիաբազա ժամանելուն պես պարզ դարձավ, որ մեր ուժերն ամբողջությամբ դուրս են բերվել մարտական ​​բոլոր գծերից, իսկ բանակի վերջին դիրքերն ընկել են։ <…> Քանի որ անհնար էր լքել բազան, Մոսկվան դիմել է բազայի հրամանատարությանը կիրակի՝ դեկտեմբերի 8-ի երեկոյան, անհապաղ տարհանում կազմակերպելու խնդրանքով»,- ասվում է հայտարարության մեջ։

Ըստ Ասադի՝ այս իրադարձությունների ընթացքում ինքը «երբեք չի մտածել հրաժարական տալու կամ ապաստան փնտրելու մասին» և դրա համար առաջարկներ չի ստացել։

News.am