Դանիելյան․ Ձեր ասածից մարդ բան չհասկացավ, Կիրանց-Ոսկեպար ճանապարհից որևէ հատված տալու՞ եք Ադրբեջանին (ՏԵՍԱՆՅՈՒԹ)

Մենք մեր աշխատանքների արդյունքում ձեռք բերված պայմանավորվածությունները հրապարակում ենք պարտադիր՝ մամուլի հաղորդագրությունների տեսքով, և այդ շրջանակից դուրս չենք գալիս: Այս մասին այսօր՝ հունվարի 22-ին, ԱԺ-ում հարցուպատասխանի ժամանակ նշեց փոխվարչապետ Մհեր Գրիգորյանը՝ անդրադառնալով «Հայաստան» խմբակցության պատգամավոր Գառնիկ Դանիելյանի հարցին, թե սահմանազատման գործընթացում Հայաստան-Վրաստան միջպետական ճանապարհի Ոսկեպար-Կիրանց հատվածում որևէ հատվածի հանձնում ադրբեջանական կողմին կա, թե՞ չկա:

«Մենք ունենք հաստատված կանոնակարգ և այն հստակ նկարագրում է, թե ինչպես են կայացվում որոշումները, ինիչ տեսք են ստանում այդ որոշումները և ինչպես են դրանք մտնում ուժի մեջ: Այս շրջանակներում դուք կարող եք գտնել ձեր հարձի պատասխանը»,-ասաց փոխբվարչապետը:

Գառնիկ Դանիելյանն էլ արձագանքեց. «Միգուցե դահլիճում հարցնենք, որևէ մեկը ձեր ասածից բան հասկացա՞վ, թե ոչ: Կոնկրետ հարց եմ տալիս, ակնկալում եմ հստակ պատասխան»:

Մհեր Գրիգորյանն ասաց. «Նախ հաշվի առնելով հարցի կարևորությունը և զգայնությունը, դուք պարտավոր եք նաև բացահայտեք, թե որ աղբյուրից եք ստացել նման տեղեկատվություն: Հարցերը, որոնց շուրջ ձեռք է բերվում պայմանավորվածություն, հրապարակվում են, և չեն կարող գաղտնի մնալ: Վերջին հանդիպման վերաբերյալ կա մամուլի հաղորդագրություն, որտեղ արտացոլված է, թե ինչ ենք մենք պայմանավորվել: Եթե ձեր ասածը այդ պայմանավորվածության մեջ չկա, ուրեմն չկա նման պայմանավորվածություն»:

News.am