Պեսկով․ Իրանի միջուկային ծրագրի հարցը կարող է և պետք է լուծվի դիվանագիտական ճանապարհով

Մոսկվան համոզված է, որ Իրանի միջուկային ծրագրի հարցը կարող է և պետք է լուծվի դիվանագիտական ​​ճանապարհով՝ ներգրավված բոլոր կողմերի քաղաքական կամքի առկայության դեպքում։ Այս մասին իրանական IRNA գործակալությանը տված հարցազրույցում հայտարարել է ՌԴ նախագահի մամուլի քարտուղար Դմիտրի Պեսկովը։

Նրա խոսքով՝ Ռուսաստանը Իրանին դիտարկում է որպես կարևոր գործընկեր և մտադիր է համակողմանի զարգացնել երկկողմ հարաբերությունները։ Մոսկվան պատրաստ է նաև աջակցել Թեհրանին միջուկային ծրագրի հետ կապված խնդիրների լուծման հարցում։

«Մենք կարևոր ենք համարում լավ հարաբերություններն ու գործընկերությունը Իրանի հետ և պատրաստ ենք աջակցել այնպիսի առանցքային խնդիրների լուծմանը, ինչպիսին է Իրանի միջուկային ծրագիրը», - նշել է Պեսկովը։

Իրանի միջուկային ծրագիրը շարունակում է մնալ միջազգային քաղաքականության առանցքային հարցերից մեկը։ Թեհրանը պնդում է, որ իր մշակումները բացառապես խաղաղ բնույթ են կրում, սակայն արևմտյան երկրները, ներառյալ Միացյալ Նահանգները և Իսրայելը, կասկածում են, որ նա ձգտում է միջուկային զենք ստեղծել:

2015-ին Մեծ Բրիտանիան, Գերմանիան, Չինաստանը, Ռուսաստանը, ԱՄՆ-ն, Ֆրանսիան և Իրանը կնքեցին միջուկային գործարք (Իրանի միջուկային ծրագրի վերաբերյալ Գործողությունների համատեղ համապարփակ ծրագիր), որը ենթադրում էր պատժամիջոցների վերացում՝ Իրանի միջուկային ծրագիրը սահմանափակելու դիմաց: Դոնալդ Թրամփի նախորդ նախագահության օրոք՝ 2018 թվականի մայիսին, ԱՄՆ-ը դուրս եկավ ծրագրից և վերականգնեց Թեհրանի դեմ պատժամիջոցները: Ի պատասխան՝ Իրանը հայտարարեց համաձայնագրի շրջանակներում իր պարտավորությունների փուլային կրճատման մասին՝ հրաժարվելով, մասնավորապես, միջուկային հետազոտությունների և ուրանի հարստացման մակարդակի սահմանափակումներից: Գործարքը վերականգնելու Բայդենի վարչակազմի ջանքերը ձախողվեցին երաշխիքների բացակայության և պատժամիջոցների ամբողջական վերացման` Իրանի պահանջների պատճառով:

Ռուսաստանը աջակցում է խնդրի դիվանագիտական ​​կարգավորմանը և շարունակում է Իրանի հետ համագործակցությունը ատոմային ոլորտում, այդ թվում՝ «Բուշեր» ԱԷԿ–ի կառուցման հարցում։ Միևնույն ժամանակ Թեհրանն ընդլայնում է հարստացված ուրանի ծավալները, ինչը մտահոգում է ՄԱԳԱՏԷ-ին և արևմտյան երկրներին։ Իրավիճակը կարգավորելու շուրջ բանակցությունները շարունակվում են։

Sputnik Արմենիա