Աբխազիայում ընտրություններից առաջ փորձել են վախեցնել հայերին. ՌԴ ՔԿ-ն ստուգումներ է սկսել

Աբխազիայում նախագահական ընտրությունների ժամանակ հայ բնակչության իրավունքների ոտնահարման նոր փաստեր են արձանագրվել։ Այս մասին հայտնել է ՌԴ քննչական կոմիտեի պաշտոնական ներկայացուցիչ Սվետլանա Պետրենկոն։

Նա հիշեցրել է, որ Ռուսաստանի սահմաններից դուրս հանցագործություն կատարած օտարերկրյա քաղաքացիները կարող են քրեական պատասխանատվության ենթարկվել ՌԴ օրենսդրության համաձայն, եթե նրանց գործողություններն ուղղված են եղել Ռուսաստանի քաղաքացիների դեմ։

Լրատվամիջոցների և սոցցանցերի տվյալների համաձայն՝ փետրվարի 19-ին Գագրայի Ծանդրիփշ գյուղում 20 մեքենաներով ժամանած մի քանի տասնյակ հոգանոց խումբը ճնշում է գործադրել գյուղական բնակավայրերի ղեկավարների վրա՝ փորձելով ստիպել հայ բնակչությանը հրաժարվել ընտրություններին մասնակցելուց։ Այդ մարդկանց թվում, հետաքննության տվյալներով, եղել են Դիմա Արձինբան, Մասիկ Շաքրիլը՝ Գենադի Այբայի անչափահաս որդին և այլոք։

Նախաքննության շրջանակներում նշանակվել են անհրաժեշտ փորձաքննություններ, այդ թվում՝ լեզվաբանական։ Հետաքննությունը նաև իրավաբանական օգնության հարցում է ուղարկել։

Իրավիճակը սրվել է փետրվարի 17-ին, երբ սոցցանցերում աուդիոձայնագրություն է հայտնվել, որտեղ ընդդիմադիր թեկնածու Ադգուր Արձինբայի կողմնակից Էնվեր Բգանբան (Աբխազիայի նախագահի պաշտոնակատարի զարմիկը) կոչ էր անում կոշտ գործողությունների դիմել հայ համայնքի դեմ։

«Երկրորդ փուլի համար պետք է շատ կոնկրետ եզրակացություններ անել, այդ թվում՝ հայերի վերաբերյալ: Աբխազներն էլ շատ տեղերում քաշեցին, բայց հայերը... Նրանց հետ պետք է արդեն այլ կերպ աշխատել։ Նրանց պետք է միայն վախեցնել...», – հայտարարել է նա:

Ավելի ուշ համացանցում նոր ձայնագրություններ հայտնվեցին, որոնք հաստատում էին Արձինբայի կողմնակիցների կողմից հայ բնակչության հասցեին հնչող սպառնալիքները։

Հիշեցնենք, որ փետրվարի 15-ին Աբխազիայում նախագահական ընտրություններ էին։ Մասնակցությունը կազմել է 69%։

Քանի որ թեկնածուներից ոչ մեկը չի ստացել ձայների 50%-ից ավելին, մարտի 1-ին երկրորդ փուլ է նշանակված։ Դրան կմասնակցեն փոխնախագահ Բադրա Գունբան (առաջին փուլում՝ 46,38%) և էկոնոմիկայի նախկին նախարար Ադգուր Արձինբան (36,92%)։

Sputnik Արմենիա