Թրյուդոն չի բացառել, որ Կանադան զորք կուղարկի Ուկրաինա

Կանադան դիտարկում է հակամարտության ավարտից հետո Ուկրաինայի անվտանգության ապահովմանը մասնակցելու բոլոր հնարավոր տարբերակները՝ չբացառելով զինծառայողներ ուղարկելու հնարավորությունը: Ինչպես հայտնում է ՌԻԱ Նովոստին, Կիևում կայացած ասուլիսի ժամանակ այդ մասին հայտարարել է վարչապետ Ջասթին Թրյուդոն։

Պատասխանելով հետկոնֆլիկտային կարգավորման շրջանակում կանադացի զինվորականների տեղակայման հնարավորության մասին հարցին՝ Թրյուդոն ընդգծել է, որ բոլոր տարբերակները սեղանին են:

Նա նաև նշել է, որ Օտտավան կշարունակի համագործակցությունը ՆԱՏՕ-ի դաշնակիցների և եվրոպացի գործընկերների հետ Ուկրաինայի անվտանգության ապահովման հարցերում:

«Մենք գիտենք, որ փոփոխվող աշխարհի պայմաններում մենք պետք է ավելի ու ավելի շատ բան անենք կայունությունն ու անվտանգությունը պահպանելու համար»,-ասել է Թրյուդոն:

Վարչապետը հիշեցրել է, որ Կանադան արդեն զգալիորեն ավելացրել է իր պաշտպանական ծախսերը. եթե տասը տարի առաջ դրանք կազմում էին ՀՆԱ-ի 1%-ից պակաս, ապա հիմա երկիրը նպատակ ունի մինչև 2030 թվականը հասնել 2%-ի։

«Մենք կաշխատենք մեր գործընկերների հետ, բայց այս հարցում բոլոր տարբերակները հնարավոր են, որովհետև մենք պետք է համոզվենք, որ ժամանակակից աշխարհում «ուժն է ամեն ինչ որոշում» սկզբունքն այլևս չի գործում», – հավելել է նա:

Հիշեցնենք՝ 2022–ի փետրվարի 24-ի վաղ առավոտյան Ռուսաստանի նախագահ Վլադիմիր Պուտինը հայտարարեց, որ Ուկրաինայի նկատմամբ ռազմական հատուկ գործողություն սկսելու որոշում է կայացրել, քանի որ ԼԺՀ-ն ու ԴԺՀ-ն դիմել են օգնության խնդրանքով։

Պուտինի խոսքով` նպատակը մեկն է` պաշտպանել նրանց, ովքեր 8 տարի շարունակ ծաղրի ու ցեղասպանության են ենթարկվել Կիևի ռեժիմի կողմից, և դրա համար նախատեսվում է իրականացնել Ուկրաինայի ապառազմականացում, դատի տալ բոլոր ռազմական հանցագործներին, որոնք պատասխանատու են Դոնբասի խաղաղ բնակիչների դեմ արյունալի հանցագործությունների համար: Արևմուտքի երկրներն ի պատասխան լայնածավալ պատժամիջոցներ են սահմանել Ռուսաստանի դեմ։

Sputnik Արմենիա