Բելառուսից Հայաստան վերադարձած բլոգերը Հայաստանի իշխանություններին անգործության մեջ է մեղադրել

Բելառուսից Հայաստան վերադարձած բլոգեր Բելլա Բաբախանյանը Հայաստանի իշխանություններին անգործության մեջ է մեղադրել։

Նա ընդգծել է, որ հայրենիք է վերադարձել բացառապես ԱԺ նախկին պատգամավոր, գործարար Գագիկ Ծառուկյանի ջանքերի շնորհիվ:

«Փոխանակ մի սովորական աղջկա համար պարոն Ծառուկյանի արած գործը մի քիչ գնահատեիք, դրել ու ինչեր եք քննարկում։ Չէ որ նա այս գորխն արել է ձեր փոխարեն»,- մարտի 5-ին ԱԺ-ում ՀՀ ԱԳ նախարար Արարատ Միրզոյանի հայտարարություններին ի պատասխան հայտարարել է Բաբախանյանը:

Բլոգերը հավելել է, որ արդեն 10 օր է՝ Հայաստանում է, «բայց կառավարության կողմից որևէ քայլ չի տեղել»։

Փետրվարի 14-ին Բաբախանյանի ձերբակալության մասին հայտնել էր բլոգեր Ալեքսանդր Լապշինը: Ավելի ուշ Ծառուկյանի մամուլի խոսնակ Իվետա Տոնոյանը հայտնել էր, որ բլոգերին օգնելու համար գործարարն օգտագործել է իր բոլոր հնարավոր և հասանելի միջոցներն ու կապերը։

Փետրվարի 25-ին Տոնոյանը տեղեկացրել էր Բաբախանյանի Հայաստան ժամանելու մասին։

Մարտի 5-ին ՀՀ ԱԳ նախարարն ԱԺ-ում հայտարարել էր, որ Երևանը պաշտոնական նոտայով դիմել է Մինսկին Բելառուսում բլոգեր Բաբախանյանի ձերբակալության կապակցությամբ:

Միրզոյանը, մասնավորապես, նշել էր. «ո՞վ է ջանքեր գործադրել բաց թողնելու համար, ո՞վ է դա ներկայացնում որպես իր ձեռքբերում, չգիտեմ։ Մեզ այդքան չի հետաքրքրում: Մենք հավաստիացել ենք, որ մեր քաղաքացին 15 օրից հետո բաց է թողնվելու»։

Armenia Today