Պակիստանում գրոհայիններն ուղևորատար գնացք են առևանգել և ավելի քան 400 պատանդ վերցրել (ՏԵՍԱՆՅՈՒԹ)

Պակիստանում «BLA» («Բելուջիստանի ազատագրական բանակ», – խմբ.) հակակառավարական խմբավորման գրոհայինները գրավել են «Jaffar Express» ուղևորատար գնացքը, որն ուղևորվում էր Քվետայից Փեշավար։ Այս մասին հայտնում են արևմտյան մի շարք լրատվամիջոցներ։

Գնացքում եղել է ավելի քան 400 ուղևոր։ Զինյալները պայթեցրել են երկաթգծերը՝ ստիպելով, որ գնացքը կանգ առնի, ինչից հետո ներխուժել են և մարդկանց պատանդ վերցրել։

BLA խմբավորումը, որը հանդես է գալիս Բելուջիստանի անկախության օգտին, հայտարարել է, որ ստանձնում է հարձակման պատասխանատվությունը:

«Ցանկացած ռազմական միջամտություն կոշտ պատասխան կստանա։ Այս պահի դրությամբ 6 զինծառայող ոչնչացվել է, իսկ հարյուրավոր ուղևորներ գտնվում են BLA-ի վերահսկողության տակ: «Բելուջիստանի ազատագրական բանակն» ամբողջությամբ իր վրա է վերցնում այդ գործողության պատասխանատվությունը», - ասված է խմբավորման ներկայացուցիչ Ջեյանդա Բելուջայի՝ ԶԼՄ-ներով տարածած հայտարարության մեջ։

Պակիստանի ուժային կառույցները ժամանել են Մուշկաֆ շրջան, որտեղ տեղի է ունեցել առևանգումը: Կառավարության պաշտոնական ներկայացուցիչ Շահիդ Ռինդը հայտնել է, որ ճգնաժամը լուծելու համար նահանգի իշխանություններն արտակարգ միջոցառումներ կկազմակերպեն՝ մոբիլիզացնելով բոլոր ռեսուրսները:

Պատանդների հետ կապված իրավիճակը շարունակում է լարված մնալ, ընթանում են բանակցություններ։

Բելուջիստանը Պակիստանի ամենամեծ, բայց ամենանոսր բնակեցված նահանգն է, որը զբաղեցնում է երկրի տարածքի 44%-ը։ Տարածաշրջանում գործում է անջատողական շարժում, որի ներկայացուցիչներն Իսլամաբադին մեղադրում են առանց տեղի բնակչության մասնակցության բնական պաշարների շահագործման մեջ:

BLA-ն ամենամեծ ազգային խմբավորումն է, որը զինված պայքար է մղում կառավարության դեմ։

Sputnik Արմենիա