Գազայի հատվածում Իսրայելի հարվածների հետևանքով մահացածների թիվը հասել է 310-ի

Գազայի հատվածի վրա իսրայելական հարձակումների հետևանքով մահացածների թիվը հասել է 310-ի։ Տեղեկությունը հայտնում է անկլավի առողջապահության նախարարությունը:

«Գազայի հատվածում իսրայելական հարձակումների հետևանքով զոհերի թիվը հասել է 310-ի, հարյուրավոր վիրավորներ և անհետ կորածներ կան»,-ասված է նախարարության հաղորդագրության մեջ, որը հրապարակել է «Ալ Ջազիրա» հեռուստաալիքը:

Ավելի վաղ հաղորդվել էր, որ ՑԱԽԱԼ-ը վերսկսել է ռազմական գործողությունները Գազայի հատվածում, քանի որ ՀԱՄԱՍ-ը հրաժարվել է ընդունել հրադադարը երկարաձգելու և պատանդներին ազատ արձակելու ամերիկյան ծրագիրը:

Իսրայելական բանակը հայտարարել է, որ հարվածները հասցվում են ՀԱՄԱՍ–ի օբյեկտներին, իսկ դրանց նպատակն է ազատ արձակել բոլոր առևանգվածներին։

Հիշեցնենք` հունվարի 19-ից մինչև մարտի 1-ը Գազայի հատվածում հրադադար էր հաստատվել Իսրայելի և պաղեստինյան ՀԱՄԱՍ շարժման միջև ձեռք բերված համաձայնության շրջանակում։

Համաձայնեցված հրադադարի ավարտից հետո հրեական պետության իշխանությունները հայտարարեցին, որ ԱՄՆ նախագահի հատուկ ներկայացուցիչ Սթիվեն Ուիթկոֆը ժամանակավոր հրադադարը երկարաձգելու նոր ծրագիր է առաջարկել, քանի որ առայժմ անհնար է հաղթահարել պատերազմի լիակատար դադարեցման շուրջ տարաձայնությունները: Ըստ Նեթանյահուի գրասենյակի` Իսրայելը համաձայն է այդ ծրագրին, իսկ ՀԱՄԱՍ–ը՝ ոչ։

Sputnik Արմենիա