Թեհրանի խորհրդանիշներից մեկը` «Ազադի» աշտարակը, լուսավորվել է ՀՀ դրոշի գույներով

Իրանական Ամանորի նախատոնական միջոցառումների շրջանակում Թեհրանի խորհրդանիշներից մեկը՝ «Ազադի» աշտարակը, լուսավորվել է տարբեր երկրների, այդ թվում՝ Հայաստանի Հանրապետության պետական դրոշով։ Տեղեկությունը հայտնում է Իրանում ՀՀ դեսպանությունը։

«Աշտարակի վրա ներկայացվել է նաև նոուրուզյան հայերեն շնորհավորանք՝ «Նովրուզ շնորհավոր»` վկայելով գարնանամուտի այս հնագույն տոնի համամարդկային նշանակությունն ու հայ և իրանցի ժողովուրդների միջև դարավոր բարեկամությունը»,– ասված է հաղորդագրությունում։

Նշենք, որ իրանական Ամանորը` Նովրուզը, նշվում է գարնանային գիշերահավասարի օրը, ինչը սովորաբար տեղի է ունենում մարտի 21-ին կամ նախորդ/հաջորդ օրը։ Նովրուզ նշանակում է նոր օր։

Այս օրերին Իրանի փողոցներն ու շուկաները մարդաշատ են։ Բոլորը գնումներ են կատարում, որպեսզի տոնը նշեն մեծ շուքով։

Տոնի ընթացքում սեղանին սփռոց է գցվում, որի վրա պետք է «ս» տառով սկսվող 7 իր լինի` չքաղված նորածիլ կանաչի ափսեում (սաբզե), ածիկ (սամանու), փշատ (սենջեդ), սխտոր (սիռ), խնձոր (սիբ), սումախ (սոմաղ), և քացախ (սեռքե)։ Սեղանին նաև այլ իրեր են դնում` հայելի, ներկած հավկիթներ, մետաղադրամներ, Ղուրան և այլն։

Նովրուզի ժամանակ հարազատներն այցելում են միմյանց, և մեծերը երեխաներին դրամ են նվիրում։

Նշենք նաև, որ հարևան երկրի ժողովրդից շատերը նախընտրում են տոնի առթիվ ճամփորդել և հաճախ որպես գլխավոր երթուղի ընտրում են հենց Հայաստանը։

Sputnik Արմենիա