ԱՄՆ Սենատը հավանություն է տվել բյուջեի նախագծին, որն ուղղված է պետական ծախսերի կտրուկ կրճատմանը

ԱՄՆ Սենատը շաբաթ օրը վաղ առավոտյան հավանություն է տվել բյուջեի նախագծին, որն ուղղված է տրիլիոն դոլարներով ավելացնել հարկային արտոնությունները և կտրուկ կրճատել պետական ​​ծախսերը, հայտնում է Reuters-ը։

Օրենսդիր մարմնի ամբողջ գիշեր շարունակված նիստից հետո տեղի ունեցած քվեարկությունը ճանապարհ է բացում մանևրի համար, որը հանրապետականներին թույլ կտա շրջանցել Սենատը և այս տարի ընդունել հարկերի նվազեցման օրինագիծն առանց դեմոկրատների մասնակցության:

Վերլուծաբանների գնահատմամբ, եթե այս միջոցառումն ընդունվի, ապա հաջորդ տասնամյակում դաշնային կառավարության պարտքը կմեծանա մոտ 5,7 տրիլիոն դոլարով:

Սենատի հանրապետականները պնդում են, որ այս միջոցառման արժեքը կազմում է 1,5 տրիլիոն դոլար՝ հայտարարելով, որ գործող հարկային քաղաքականության, որի գործողության ժամկետը լրանում է այս տարվա վերջին, երկարաձգման հետևանքները չպետք է հաշվի առնվեն միջոցառման արժեքի մեջ:

Միջոցառումը նաև նպատակ ունի բարձրացնել դաշնային կառավարության պարտքի վերին սահմանը 5 տրիլիոն դոլարով, ինչը Կոնգրեսը պետք է անի մինչև ամառ, այլապես պարտքի 36,6 տրիլիոն դոլարի դեֆոլտ կառաջանա:

Այն նպատակ ունի մասամբ փոխհատուցել հարկերի նվազեցման ծախսերը, որոնք կհանգեցնեն դեֆիցիտի մեծացմանը:

Իր հերթին դեմոկրատները նախազգուշացրել են, որ հանրապետականների ​​նպատակները կվտանգեն ցածր եկամուտ ունեցող ամերիկացիների համար Medicaid առողջության ապահովագրության ծրագիրը:

News.am