Շահրամանյան․ Նախկին նախագահները մնացին Արցախում, որ խաղաղ բնակչությունը դուրս գա

Արցախի մեր գործընկերների հետ եկել ենք Ծիծեռնակաբերդ՝ մեր հարգանքի տուրք մատուցելու 110 տարի առաջ տեղի ունեցած Ցեղասպանության զոհերին: Այս մասին այսօր՝ ապրիլի 24-ին, Ծիծեռնակաբերդի հուշահամալիրում լրագրողների հետ զրույցում նշեց Արցախի նախագահ Սամվել Շահրամանյանը:

«Իհարկե դատապարտում ենք նման գործողությունները և տեսնում ենք որ չդատապարտված ցեղասպանությունը իր շարունակությունն է ունենում աշխարհի տարբեր ծայրերում, այդ թվում մենք ականատես ենք եղել դրա դրսևորումներին Արցախում»,-ասաց նա:

Հարցին՝ ինչպե՞ս է գնահատում այն, որ ՀՀ իշխանությունները հայտարարում են, որ Ցեղասպանության ճանաչումը իրենց համար առաջնահերթություն չէ, Շահրամանյանն ասաց. «Իշխանության մեկնաբանումները ես թողնում եմ Հայաստանի Հանրապետության քաղաքացիներին: Անհնարին է մոռացության մատնել Ցեղասպանության դրսևորումը»:

Հարցին՝ ինչո՞ւ Հայաստան գալուց հետո Արցախի լուծարման հրամանագիրը չչեղարկեցիք, նա պատասխանեց. «Նախ, այդ փաստաթուղթը որևիցե իրավական ուժ չունի: Դրա մասին մենք հայտարարել ենք, դրա պատճառների մասին խոսել ենք և մեր տեղեկատվական շտաբով մանրամասն տեղեկություն տվել ենք։ Դրան ավելացնելու բան չունեմ։ Ես ասել եմ՝ ով կուզենա տեսնել Արցախը որևիցե իրավական խնդիր չունի»:

Մեղադրանքներին, թե այդ ինչպե՞ս եղավ, որ դուք ուղաթիռով եկաք, իսկ մյուսներին թողեցիք, որ մնան գերևարվեն, նա ասաց. «Ես ամենավերջում եմ դուրս եկել, այդ թվում գերեվարվելուց հետո: Ես Արցախում էի, երբ Արցախի նախկին նախագահներին ձերբակալեցին: Ես տեսել եմ, ինչպես են նրանց տարել»:

Նա չցանկացավ այդ մասին ավելի մանրամասն խոսել. «Դրա մասին այս պահին չեմ ուզում խոսել, հետագայում առիթ կունենանք, մանրամասն կանդրադառնանք, մենք թաքցնելու բան չունենք: Այս պահին կան գործընթացներ, որոնց մենք չենք ուզում խոչընդոտել կամ վնասել մեր հայտարարություններով: Դրանով է պայմանավորված մեր զսպվածությունը։

Այդ մարդիկ, ովքեր հայտնվել են Ադրբեջանի բանտերում, հենց առաջին օրվանից, որ մենք հարց ենք բարձրացրել, որ պետք է բացվի Լաչինի միջանցքը և խաղաղ բնակչությունը հնարավորություն ունենա դուրս գալու, այդ պահանջը ներկայացվել է ադրբեջանական կողմից: Այդ մարդիկ մնալով որպես կենդանի պատանդ, ապահովել են մեր խաղաղ բնակչության դուրս բերումը»:

Շահրամանյանը պնդեց, որ հնարավորություն չկար բանակցություններով հասնել նրան, որ նախկին նախագահները և մյուսները չգերեվարվեն:

News.am