ՌԴ ՊՆ բարձրաստիճան գեներալ է զոհվել Մոսկվայի մարզում ավտոմեքենայի պայթյունից

Ապրիլի 25-ի առավոտյան Մոսկվայի մարզի Բալաշիխա քաղաքի «Օդանավորդների» միկրոշրջանում բնակելի շենքի կողքին ավտոմեքենա է պայթել։ Պայթյունի հետևանքով զոհվել է Ռուսաստանի զինված ուժերի գլխավոր շտաբի գլխավոր օպերատիվ վարչության պետի տեղակալ, գեներալ-լեյտենանտ Յարոսլավ Մոսկալիկը, հաղորդել են Mash, Baza և Shot լրատվական գործակալությունները։ Baza-ի տվյալներով՝ Նեստերովի պողոտայի 2-րդ տան մոտ կայանված Volkswagen Golf մակնիշի ավտոմեքենան պայթել է այն պահին, երբ գեներալն է անցել ավտոմեքենայի կողքով։ Բարձրաստիճան զինվորականը շպրտվել է մի քանի մետր հեռավորության վրա։

Shot տվյալներով՝ ավտոմեքենայի ներսում տեղադրված ինքնաշեն պայթուցիկ սարքը պայթեցվել է հեռակառավարմամբ։ Այն լի էր վնասաբեր տարրերով։ Պայթյունն այնքան հզոր է եղել, որ վնասել է մոտակա շենքի մի քանի հարկերի պատուհանները, նշում է «Осторожно, Москва» կայքը։ Քննչական կոմիտեն հաստատել է Մոսկալիկի մահը և հայտնել, որ հարուցվել է քրեական գործ՝ սպանության և պայթուցիկ նյութերի ապօրինի շրջանառության հատկանիշներով (Քրեական օրենսգրքի 105-րդ և 222.1-րդ հոդվածներ):

2015 թվականին Մոսկալիկը «Նորմանդական ձևաչափի» շրջանակում մասնակցել է Ուկրաինայի հետ բանակցություններին, ինչպես նաև զեկուցող է եղել Սիրիայում Ռուսաստանի ռազմական գործողությանն առնչվող թեմաներով։ Ռուսաստանի նախագահ Վլադիմիր Պուտինը նրան 2021 թվականին գեներալ-լեյտենանտի կոչում է շնորհել: 2022 թվականին Մոսկալիկը շահել է Պաշտպանության նախարարության դատական ​​հայցը Բալաշիխայի մի շենքում գտնվող բնակարանի համար, որի մոտ այսօր պայթյուն է տեղի ունեցել, հիշեցրել է «Осторожно, новости» կայքը:

Պայթեցված Volkswagen-ն, ըստ Mash-ի, այս տարվա հունվարի վերջից ի վեր առնվազն երեք անգամ ձեռքից ձեռք է անցել։ Սկզբում այն ​​պատկանել է 35-ամյա Մարգարիտա Վ.-ին, որը մեքենան փոխանցել է 1995 թվականին ծնված Ադրբեջանի քաղաքացու: Նա գրեթե անմիջապես վերավաճառել է ավտոմեքենան 26-ամյա Անդրեյ Պ.-ին, որն իր հերթին մեկ շաբաթ անց արտասահմանյան ավտոմեքենան վաճառել է Ուկրաինայի Սումի քաղաքում ծնված 40-ամյա Իգնատ Կ.-ին:

News.am