Լարված իրավիճակ Սիրիայում. բախումներ են սկսվել նաև Սահնայայում (ՏԵՍԱՆՅՈՒԹ)

Դամասկոսի արվարձան Սահնայայում բախումներ են սկսվել դրուզների և իշխանամետ զինված խմբավորումների միջև։

Մերձավոր Արևելքին վերաբերող թեմաները լուսաբանող Telegram-յան ալիքները հաղորդում են, որ չափազանց լարված իրավիճակ է։ Ինտենսիվ փոխհրաձգություն է սկսվել գիշերվանից։ Երկու կողմից էլ կան զոհեր և վիրավորներ։

Ավելի վաղ Իդլիբից լրացուցիչ ուժեր են բերվել իշխանամետ զինված խմբավորումներին օգնելու համար։

Դրուզների ուժերը դարանի մեջ են ընկել Դամասկոս-Սուվեյդա ճանապարհին, և հենց այդտեղ բախումներ են սկսվել։

Միաժամանակ դրուզները բողոքի ակցիա են անցկացնում Իսրայելի հյուսիսում։ Նրանք փակել են մայրուղին և անվադողեր են այրում՝ պահանջելով միջամտել և կանխել Սիրիայում բնակվող իրենց մերձավորների կոտորածը։

Իսրայելի վարչապետ Բենիամին Նեթանյահուի գրասենյակն այսօր հայտարարել է, որ Դամասկոսին զգուշացրել է հեռու մնալ դրուզներից, և Թել Ավիվը կանխարգելիչ հարված է հասցրել:

Նշենք, որ երեկ Սիրիայի «անվտանգության ուժերի» և դրուզների միջև բախումներ էին տեղի ունեցել Ջարամանա քաղաքի մոտակայքում։

Հիշենք, որ այս տարվա մարտին զինված խմբավորումները Սիրիայի ափին ալավիների և քրիստոնյաների զանգվածային սպանություններ էին իրականացրել։ Լիբանանյան «Al Nahar» թերթի տվյալներով` Սիրիայի նոր իշխանությունների անվտանգության ուժերի և ապստամբ ալավիների (մահմեդականներ, որոնք կազմում են Սիրիայի բնակչության 10%-ը և բնակվում են երկրի արևմուտքում) բախումների ժամանակ մահացածների թիվը հասել է հազարի։ Սակայն, ոչ պաշտոնական տվյալներով, զոհերի թիվը շատ ավելի մեծ է։

Sputnik Արմենիա