Ռուբեն Վարդանյանի գործով «դատը» Բաքվում. պաշտպանական կողմի բողոքը թողել են առանց քննության

Բաքվում շարունակվում Արցախի նախկին պետնախարար, բարերար Ռուբեն Վարդանյանի «դատավարությունը»:

Ինչպես հաղորդում են ադրբեջանական ԶԼՄ-ները, «նիստի» ընթացքում փաստաբան Աբրահամ Բերմանը հայտարարել է, որ փետրվարի 6-ի նիստի արձանագրությանը ծանոթանալիս «դատական կոլեգիայի» կազմի դեմ բողոքի հիմքեր են ի հայտ եկել:

Նրա խոսքով՝ «դատական նիստի» արձանագրությունում արտացոլված չէ «դատարանի» վերաբերմունքը պաշտպանական կողմի միջնորդությունների նկատմամբ, և դա հիմնավոր կասկածներ է առաջացնում նրա օբյեկտիվության և անկողմնակալության վերաբերյալ:

Փաստաբանն ու Վարդանյանը բողոք են հայտնել «դատական կոլեգիայի» դեմ:

Գլխավոր դատախազի ավագ օգնական Վյուսալ Ալիևն ի պատասխան հայտարարել է, որ պաշտպանական կողմի նշած հանգամանքը «հիմք չէ դատական կոլեգիայի բացարկի համար»:

Նրա կարծիքով` իբր, «պաշտպանական կողմը, օգտագործելով շարունակ նույն մեթոդները, նպատակ ունի ձգձգել դատական գործընթացը»:

Ալիևը «դատարանին» խնդրել է բողոքը թողնել առանց քննության։ Նրա խնդրանքին միացել են «տուժողները»։

«Դատարանը» հեռացել է խորհրդակցության, ինչից հետո հրապարակել է բողոքն առանց քննության թողնելու որոշումը։ Այնուհետև հարցաքննվել են «տուժողները»։

Հաջորդ «դատական նիստը» տեղի կունենա մայիսի 13-ին:

Հիշեցնենք` հունվարի 17-ից Ադրբեջանում ընթանում է Արցախի նախկին ռազմաքաղաքական առաջնորդների գործով «դատավարությունը»: Մեղադրյալների թվում են նախկին նախագահներ Արկադի Ղուկասյանը, Բակո Սահակյանը, Արայիկ Հարությունյանը, Արցախի ԱԺ նախագահ Դավիթ Իշխանյանը, պաշտպանության փոխնախարար Դավիթ Մանուկյանը, ՊԲ նախկին հրամանատար Լևոն Մնացականյանը, նախկին արտգործնախարար Դավիթ Բաբայանը և այլք:

Նախկին պետնախարար և բարերար Ռուբեն Վարդանյանի գործը քննվում է առանձին վարույթով: Չնայած գործի նյութերը մյուսների հետ միավորելու նրա խնդրանքին` դատարանը որոշել է 422 հատորներից 400-ը դիտարկել առանձին:

Ռուբեն Վարդանյանը փետրվարի 19–ից հացադուլ սկսեց, որը դադարեցրեց մարտի 13-ին։

Sputnik Արմենիա