ԱՄՆ-ի Ռոդ Այլենդ նահանգում ընդունել են Թուրքիայում հույների ցեղասպանության մասին բանաձևը

ԱՄՆ Ռոդ Այլենդ նահանգի օրենսդիր ժողովն ընդունել է 1913-1923 թվականներին Օսմանյան և Քեմալական Թուրքիայում Պոնտոսի և Փոքր Ասիայի հույների նկատմամբ իրականացված ցեղասպանությունը ճանաչող բանաձև: Փաստաթղթի նախաձեռնողը եղել է նահանգի սենատոր Լեոնիդաս Ռապտակիսը՝ հունական համայնքի ներկայացուցիչը։

Բանաձևի համաձայն՝ մայիսի 19 - ը պաշտոնապես հայտարարվում է պետական մակարդակով հույների ցեղասպանության զոհերի հիշատակի օր:

«Այս բանաձևը հարգանքի տուրք է ոչ միայն զոհվածների, այլև նրանց ժառանգների հիշատակին, ովքեր անգնահատելի ներդրում են ունեցել Ռոդ Այլենդի մշակույթի և պատմության մեջ։ Մենք իրավունք չունենք մոռանալ այն տարիների սարսափները, որպեսզի նման հանցագործությունները չկրկնվեն», - հայտարարել է Ռապտակիսը փաստաթուղթը ներկայացնելիս։

Բանաձևն ընդունվել է միաձայն՝ ներառյալ հայազգի սենատոր Դավիթ Տիկոյանի ձայնը:

Հիշեցնենք, որ Պոնտեում (ներկայիս Թուրքիայի սևծովյան ափին գտնվող տարածաշրջան) և Փոքր Ասիայի այլ մասերում տեղի ունեցած զանգվածային սպանությունների և տեղահանությունների հետևանքով զոհվել են հարյուր հազարավոր հույներ: 2015 թվականին Հայաստանի խորհրդարանը ճանաչել է հույների և ասորիների ցեղասպանությունը՝ համերաշխություն հայտնելով տուժած ժողովուրդներին:

Մայիսի 19- ի օրվան ընդառաջ հիշատակի միջոցառումներ են անցկացվել նաև Ավստրալիայի հունական համայնքներում՝ Հունաստանի սահմաններից դուրս ամենամեծ գաղթօջախներից մեկում:

Sputnik Արմենիա