Կրոնագետ․ Պետությունը իրավունք չունի խառնվելու եկեղեցու գործերին

Պետությունը սահմանադրորեն իրավունք չունի խառնվել կրոնական կազմակերպության (այս դեպքում՝ Հայ առաքելական եկեղեցու) ղեկավարի ընտրությանն ու քննարկել նրա բարեվարքությունը։ Այս մասին Sputnik Արմենիայի հետ զրույցում ասաց ԵՊՀ Աստվածաբանության ֆակուլտետի կրոնագիտության ամբիոնի վարիչ Պարգև Բարսեղյանը։

Նա հիշեցնում է, որ կաթողիկոսին ընտրում է Ազգային եկեղեցական ժողովը իր պատվիրակներով ու իր կանոնակարգով, ու պետությունն այս առումով որևէ գործողություն չի կարող կատարել։

«Սահմանադրությամբ վաղուց ամրագրված է, որ կրոնական կազմակերպությունները անջատ են պետությունից, և եթե եկեղեցին պետությունից անջատ է, ուրեմն հանդես է գալիս մոտավորապես ՀԿ–ների բնորոշ օրենսդրության շրջանակներում, որպես առանձին կազմակերպություն, որը ինքն է որոշում իր ղեկավարի ընտրության կարգը և ձևը, այսինքն՝ պետությունը այս հարցում ոչ մի իրավասություն չունի»,– նշեց նա։

Կրոնագետը նշում է, որ պետությունը կարող է միայն իր լիազորությունների շրջանակում Հայաստանում գործող կրոնական կազմակերպությունների ազատ, թափանցիկ ու ժողովրդավար գործունեությունը կազմակերպել, մնացածն արդեն կազմակերպության գործն է։ Ըստ նրա` պետությունը իրավասու չէ նաև որևէ կազմակերպության անդամների գործունեությունը խոչընդոտել, դա կարող է արվել միայն օրենքով սահմանված կարգով։

«Բարեվարքության հետ կապված. թե ինչ գործունեություն է ծավալում կաթողիկոսը, դա միայն իր հետևորդների , հավատացյալների խնդիրն է, նրանք պետք է որոշեն` ում են հետևում»,– հավելեց նա։

Ամփոփելով` կրոնագետը նշեց, որ պետության միջամտությունը եկեղեցու ներքին կյանքին ու գործունեթյանը վիճելի է ու հավելեց, որ տվյալ դեպքում եկեղեցին կարող է դիմել Սահմանադրական դատարան կամ եվրոպական դատարան՝ իր իրավունքները պաշտպանելու համար։

ՀՀ վարչապետը երեկ կառավարության նիստում քննադատել էր եկեղեցիների վիճակը՝ անվանելով դրանք «չուլանացված և աղբով լի»։ Փաշինյանի այս արտահայտությունները փոխադարձ քննադատության էին արժանացրել բարձրաստիճան հոգևորականները։

Այսօր առավոտյան Փաշինյանը տգեղ բառապաշարով գրառումներ էր արել Հայ առաքելական եկեղեցու և բարձրաստիճան հոգևորականների մասին։ Եկեղեցուն վերաբերող վիրավորական գրառումներ էր արել նաև նրա կինը` Աննա Հակոբյանը։