ՄԱԿ-ի ԱԽ․ Իրանը խոսում է պատերազմի սպառնալիքի մասին, Իսրայելն «ըմբռնում» է ակնկալում

Թել Ավիվի գործողությունները հավասարազոր են պատերազմ հայտարարելուն և պարունակում են պետական ահաբեկչության գործողություններ, Իսրայելը Իրանի վրա է հարձակվել ԱՄՆ-ի աջակցությամբ։ ՄԱԿ–ի անվտանգության խորհրդի նիստում այս հայտարարությունն է արել Իրանի մշտական ներկայացուցիչ Ամիր Սաիդ Իրավանին:

«Անցած գիշեր Իսրայելի ռեժիմը՝ աշխարհի ամենավտանգավոր և ահաբեկչական ռեժիմն ԱՄՆ վարչակազմի լիակատար հետախուզական և քաղաքական աջակցությամբ համակարգված ու կանխամտածված ռազմական հարձակումների շարք է իրականացրել Իրանի մի քանի քաղաքներում», - ասել է Իրավանին։

Նա նշել է, որ Իրանի միջուկային օբյեկտներին հասցված ցանկացած վնաս սպառնում է աղետալի հետևանքներով, այդ թվում՝ մերձավորարևելյան տարածաշրջանի սահմաններից դուրս:

ՄԱԿ-ում Իրանի մշտական ներկայացուցիչը հիշեցրել է, որ վերջերս Իսրայելի կողմից Իրանին հասցված հարվածների հետևանքով 78 մարդ Է զոհվել, ավելի քան 320-ը՝ տուժել:

«Մենք չենք մոռանա, որ մեր համաքաղաքացիները զոհվել են ամերիկյան զենքի կիրառմամբ իսրայելական հարձակումների պատճառով»,- ասել է Իրավանին:

ՄԱԿ-ում Իսրայելի մշտական ներկայացուցիչ Դենի Դանոնն էլ հայտարարել է` Իսրայելն ակնկալում է, որը ՄԱԿ-ի անվտանգության խորհուրդն արտահերթ նիստում «ըմբռնումով» կվերաբերվի հրեական պետության այն փաստարկներին, թե ինչու է հարձակվել իրանական օբյեկտների վրա։

Դանոնն Իրանին հասցված վերջին հարվածները բացատրել է նրանով, թե Թեհրանն իբր անսպասելի հարձակում էր նախապատրաստում Իսրայելի վրա։

«Նրանք ծրագրում էին հազարավոր ահաբեկիչներով և հազարավոր արկերով ներխուժել բոլոր կողմերից», - ասել է նա լրագրողներին:

Դանոնի խոսքով՝ Իսրայելը ձգտում է ոչ միայն կանգնեցնել Իրանի միջուկային ծրագիրը, այլև հասնել Թեհրանի կողմից բալիստիկ հրթիռների մշակման դադարեցման։

Համաշխարհային կազմակերպության գլխավոր քարտուղարի տեղակալ Ռոզմարի Դի Կառլոն Թեհրանին և Վաշինգտոնին կոչ է արել շարունակել Իրանի միջուկային ծրագրի շուրջ բանակցությունները:

«Այս հանգստյան օրերին Օմանում պետք է վերսկսվեին Իրանի և ԱՄՆ-ի միջև բանակցությունները։ Ես կոչ եմ անում շարունակել դիվանագիտական ջանքերը»,– ասել է նա ՄԱԿ-ի անվտանգության խորհրդի նիստի ժամանակ։

Ավելի վաղ Իրանի Իսլամական հեղափոխության պահապանների կորպուսը (ԻՀՊԿ) հայտարարել էր, որ Իրանն ի պատասխան Իսրայելի հարվածների «Ճշմարիտ խոստում 3» գործողություն է իրականացնում: Իրանի պատասխան գործողությունների մասին հայտնի դարձավ երկրի գերագույն հոգևոր առաջնորդ Ալի Խամենեիի` իրանցիներին ուղղված ուղերձից հետո, որում նա խոստացել էր ուժով պատասխանել Իսրայելին։

Sputnik Արմենիա