ՆԳՆ․ Կիբեռհանցագործություններից տուժածների պարտավորությունները բանկերի նկատմամբ կսառեցվեն

Կիբեռհանցագործություններից տուժած քաղաքացիների (խոսքն այն քաղաքացիների մասին է, որոնց անունով խաբեությամբ ձևակերպվել են վարկեր) պարտավորությունները բանկերի նկատմամբ կսառեցվեն, տոկոսները կզրոյացվեն, քաղաքացիները «սև ցուցակում» չեն հայտնվի, հայտնում է ՀՀ ՆԳՆ-ն:

Կիբեռհանցագործություններից տուժած քաղաքացիների խնդրին լուծում տալու նպատակով, ըստ հաղորդագրության, ՆԳՆ-ն ինտենսիվ քննարկումներ է իրականացրել փոխվարչապետ Մհեր Գրիգորյանի գրասենյակի, Քննչական կոմիտեի ու Կենտրոնական բանկի հետ։

«Քաղաքացիների պարտավորությունները բանկերի նկատմամբ համապատասխան պայմանագրի կնքմամբ կսառեցվեն մինչև քրեական վարույթի ավարտը, ու վարկերի գծով տոկոսներ չեն հաշվեգրվի, իսկ մինչև սույն որոշման կիրառումը տվյալ վարկերի հետ կապված հաշվարկված տոկոսները կզրոյացվեն, և ժամկետանցումները կվերացվեն (կճշգրտվեն)», – մանրամասնել է նախարարությունը:

Նշվում է նաև, որ նկատվում է նշված հանցագործության նվազման միտում՝ 2025 թվականի մարտին արձանագրվել է 85, ապրիլին՝ 52, իսկ մայիսից առայսօր՝ 22 դեպք։

ՆԳՆ-ն հորդորում է նման դեպքերից խուսափելու համար որևէ մեկին չտրամադրել անձնական տվյալներ կամ գաղտնաբառեր, չանցնել անծանոթ հղումներով:

Զեղծարարություններից տուժածներն ավելի քան 2 ամիս էր՝ ակցիաների միջոցով պահանջում էին սառեցնել զեղծարարության հետևանքով առաջացած վարկային պարտավորությունները։ ԿԲ նախագահ Մարտին Գալստյանը մարտին հայտարարել էր, որ վարկային խաբեությունների բոլոր դեպքերն ուսումնասիրելու են։ Մայիսի 6-ին նա տեղեկացրել էր, որ ԿԲ-ն բանկերին հորդորել է սառեցնել զեղծարարությունների հետևանքով հաստատված գործարքներից բխող վարկային պարտավորությունները։ Մայիսի 13-ին, սակայն, քաղաքացիներն ահազանգել էին, որ իրենց վարկերը չեն սառեցրել։

Armenia Today