Զախարովա․ Մոսկվան սպասում է «ստոպ ցուցակի» վերաբերյալ Երևանի արձագանքին (ՏԵՍԱՆՅՈՒԹ)

Ռուսական կողմը կոնկրետ քայլեր է առաջարկել ՌԴ քաղաքացիների «ստոպ ցուցակի» վերաբերյալ և սպասում է Երևանի արձագանքին։ Այս մասին հայտարարել է ՌԴ ԱԳՆ պաշտոնական ներկայացուցիչ Մարիա Զախարովան։

Հունիսի 28-ին Պետդումայի նախկին պատգամավոր և ՌԴ Դաշնային խորհրդի սենատոր, Աֆղանստանի վետերանների միության ղեկավար Ֆրանց Կլինցևիչին թույլ չեն տվել մուտք գործել Հայաստան։ Փաստաթղթերը ստուգելուց հետո սահմանապահները Կլինցևիչին հետ են ուղարկել՝ հայտարարելով, որ նա պետք է վերադառնա Ռուսաստան։

Այլ մանրամասներ չեն հաղորդվում։ Իսկ հուլիսի 5-ին կովկասագետ և Հայ–Ռուսական (Սլավոնական) համալսարանի դասախոս Կարեն Իգիթյանին արգելվել է մուտք գործել Հայաստան, թեև նա վերջին 16 տարիների ընթացքում ապրել և աշխատել է այստեղ։

Զախարովան ընդգծել է, որ Մոսկվան քննարկում է «ստոպ ցուցակի» հարցը ոչ միայն փակ դռների ետևում, այլև հրապարակային, իսկ ինքը հաճախ ստիպված է լինում մեկնաբանել այս թեման։

«Մենք Ռուսաստանի քաղաքացիների մուտքի արգելքը դիտարկում ենք որպես ոչ բարեկամական քայլ, որը հակասում է ռուս-հայկական փոխգործակցության դաշնակցային բնույթին», – նշել է դիվանագետը։

Զախարովան ընդգծել է, որ Ռուսաստանը բազմիցս կոչ է արել հայ գործընկերներին դադարեցնել այս արատավոր պրակտիկան, ավելին, հարցը քննարկվել է ՌԴ արտգործնախարար Սերգեյ Լավրովի՝ Երևան կատարած այցի ժամանակ։

«Հայկական կողմին կոնկրետ քայլեր են առաջարկվել։ Սպասում ենք Երևանի արձագանքին»,- ասել է դիվանագետը։

Նշենք, որ ռուսաստանցի փորձագետների, քաղաքական գործիչների կամ մեդիաանձանց համար Հայաստան մուտքի արգելքի բազմաթիվ դեպքեր կան։ Երկիր մուտք գործելու արգելքը գործում է մասնավորապես քաղաքագետ Անդրանիկ Միհրանյանի, Պետդումայի պատգամավոր Կոնստանտին Զատուլինի, «Ռոսիա սեգոդնյա» մեդիախմբի և RT հեռուստաալիքի գլխավոր խմբագիր Մարգարիտա Սիմոնյանի, Պետդումայի նախկին պատգամավոր և ՌԴ Դաշնային խորհրդի սենատոր Ֆրանց Կլինցևիչի, ինչպես նաև կովկասագետ և Հայ–Ռուսական (Սլավոնական) համալսարանի դասախոս Կարեն Իգիթյանի նկատմամբ։

Sputnik Արմենիա